viernes, 26 de agosto de 2011

Serraílla

Esti es un puebrinu del norti Estremaúra curiosu i procupau pola su cultura, tradicionis i palra que se niega a perdé-llas. En viendu la su difici conservacion a largu prazu, tolos añus en el mes d'Agostu, hateaus con tragis regionalis i antiguus, celebran el día de la Palra Serraillana, un día pa revindical esta palra que devían de tomal ejempru tolos puebrus d´Estremaúra.

El día deziochu d´ogañu, envitaus por Eduardo i Gonzalo, dambus los dos organizaoris del eventu, i procupaus pola cultura del su puebru, los componentis del OSCEC, Órgano de Seguimiento y Coordinación del Extremeño y su Cultura, Ismael Carmona i Bienvenido Gutierro, dierun una charlina a tentu de los pobremas la Palra Estremeña i mesmu del associacionismu ena su recuperacion i devulgacion.

El actu se realizó ena Casa la Cultura qu'estuvu achiporrotá de serraillanus, desarrollandu-si con una normalizacion escecional devíu al tema que se trató. Los ponentis huerun bien recebíus pol tratal-si dun tema tan especial. El OSCEC está hiziendu un eshuerçu de continu pa evital la rotura generacional ena trasmision la cultura estremeña. La suposicion o el abaldonu el patrimoñu oral, material i natural d'Estremaúra es algu que no ai que olvial.

Ena carava s'entrecambiarun preguntas a tentu los pobremas de supervivencia que tien la Palra Estremeña i entre otrus el del escrevieru, recomendandu-si de solucional esti pobrema escreviendu-si en revistas bien de papel o degitalis, rétulus de callis, negocius, montis, lugaris, cochis, etc., comentandu-si tamien la idea de entroduzí-lu en Educacion i ena Escuela.

Polo tantu, el OSCEC desea que las huerças politícas presentis en el Palramentu Estremeñu, den un passu palantri i llevin la Palra Estremeña a Educacion i a la Escuela, acabandu assina con el compreju d´inferioridá de muchus estremeñus pol mó de la mesma; tamien dal las gracias a los serraillanus pol cudiu ena conservacion de la su Palra i que con puebrus comu esti de juru qu´el Estremeñu está assegurau.

Bienvenido Gutierro

No hay comentarios:

Publicar un comentario