sábado, 10 de diciembre de 2011

El OSCEC en Montanchi

Dispués de lo d'ayel creu ena necessidá de prencipial a divulgal el estremeñu velaquí en esta página de la mejol manera que ai, que es escriviendu-lu.

Ayel hue un día largu de campaña de concenciación. La niebla incultava las vías los montanchegus i el fríu buscava derrotal los ánimus. Mos ayuntemus dendi primel ora ala Sociedad Cultural Pueblo de Montánchez cola que compartimus el estalachi (agraecemus la su pacencia i ayúa). Hincamus el santu. Peguemus cartelis. Endilguemus a la genti pala chalra. Precuramus que vezinus, conocíus i arrimaus supieran dela nuestra lavol... Una familia vasca que mos vidun pusiendu'l cartelinu la chalra nel estalachi las papeletas, mos preguntó pol tema. El ombri, sentíu en custionis lingüísticas, me dixu que "la idioma ai que cudiá-la i apopá-la", por sel la parti más emportanti de la coltura.

Estalachi

Por baxu la lona la carpa, dendi los estalachis que segundavan, quesus, jamonis, lomus, patateras, ducis, garrapiñatis i pitarras s'entrecambiavan por papeletas a la caterva de genti que acuían a degustal estas IX Jornadas Gastronómicas del Cerdo Ibérico. Era la primel ves que estavamus a mestural coltura oral con gastronomía. Esprimentemus á cómu diva a salil esti casoriu.

El alabán entrava, comía, echava la carava i se diva. Dispués pusun música i el genteríu se diva remoçandu a ca no ná, calentandu las entrañas con pratus tradicionalis i esprimentacionis, pingandu el gargueru con bebías de jarra, vasijas i botellas.

Montanchi por cima la niebla

Ala tardi vinun otrus compañerus del OSCEC a hazel compaña i acabal d'arrepartil los folletinus pala chalra. Vesitemus el lugal, que formi divan passandu las oras, la lengua de niebla lambía techus i casas. Dendi'l castillu s'escolumbrava el luzeru por cima las nuvis, fronteru a la luna, témida i vergonçúa que s'arropava en ves en quandu: era el momentu d'acalugal enantis dela chalra.

Sala de Actividades Culturales. Al hondón el salón Tirso Lozano Rubio andi dimus la chalra

Abaxemus del castillu i huimus derechus a retiral el santu i los papelis del estalachi pa dil a la Sala de Actividades Culturales que s'ensomava en una revuelta de frenti l'estitutu. El púbricu, retruxiendu-si muchus de los que quiximus recadal acovijaus pola fiesta, hue téntigu.

Bienvenido, enantis de prencipial la chalra

Hizu la presentación Daniel Gordo, de la Comissión de Lengua, agraeciendu'l brindagi de associacionis i ayuntamientu por poel estal allí. Hizi una entrodución al OSCEC, cola nuestra hechura, funcionamientu i propósitus i aluspués Bienvenido, biembru fundaol, dedicó unas parabras al associacionismu i dio los primerus endilguis de la lengua estremeña.

De la gocha a la derecha: Daniel Gordo, Ismael Carmona i Bienvenido Gutierro

La chalra de dispués hue a tentu del nuestru patrimoñu lingüísticu i los prencipalis rasgus, dela concencia los hablantis, del estau ogañu i huturu.

Momentus acaberus

Sin sel demaseau cansibli, polo craru está que toíta se dixu en estremeñu.

Respondiendu a las preguntas

Uvu genti que s'enteressó pol trebaju lessicográficu de Daniel i otrus, professoris i genti l'ayuntamientu que assistierun, les llamó l'atención la chalra i descubril d'essa manera las nuestras lenguas.

Postura

Hue un día largu apregonandu lo que no tien golol, sabol ni colol entre lascas de jamón i jarras de vinu. Con tó i con essu, huimus escapás de ponel la simienti en Montanchi, por baxu'l castillu, peru ai de cudiá-la con muchu apopu i almiración, paque cuaji i coja mañana frorencia.

3 comentarios:

  1. Abel si puniís anguna retrataura o mentais enos endilguis cuantu henteriu va a las chalras, que tamién emporta sabel si enteresa el assuntu a los estremeñus o no.

    ResponderEliminar
  2. Sigún los puebrus acúin más genti o menus. Ayel en Montanchi huerun 15 pressonas, en Miajás ventitantas, en Serraílla s'enllenó el aforu del teatru... Dependi de los sitius.

    ResponderEliminar
  3. Lú, entavía acontinan veleí sin pranchal la bandera XDDDDD

    ResponderEliminar