sábado, 7 de enero de 2012

El OSCEC con Gabriel y Galán


Ayel mañana hue un día grandi palas letras estremeñas, pos comu desgraciámenti pocas vezis aconteci en esta tierra, se rindió omenagi a unu de los grandis: Gabriel y Galán.

El actu hue entreverau, pos divan entrevolás las participacionis pa recital, leel o cantal en memoria del poeta entre premius, otrus omenagis i cantis, otras leturas i caravas. Comu quiera que huera, en castellanu o en estremeñu, Caçris gozó delos acuerdus las nuestras gentis, dendi los más nuevus ata los más viejus.

Gracias al ánimu i sentimientu d'angunus participantis, lo estremeñu tuvu una grandi representación en essa mañana, ondi autoridais, curiosus, familiaris i passeantis achipotarun el passeu de Cánovas ascucha el arti la parabra en qualisquiera de dambas a dos lenguas.

El actu lo abrió Bienvenido Gutierro, que echó en estremeñu la poesía Porque semos extremeños de J. Feijóo. Colegas i amigus felicitarun la su intervención.

De seguía salió Ismael Carmona, quien dedicó a Gabriel y Galán i la literatura en lengua vernácula unas parabras en estremeñu. Velaquí un cachinu dela palramenta.



En saliendu delo cordonau, una vezina de Serraílla le dio la norabuena en serraillanu.

El charramanduscu actu se destendió dispués al omenagi que hizun al cantaol Simón García Bermejo, más anombrau por El niño de la Ribera i alos premius los zagalinus que participarun en el concursu "Escolares en el Paseo de Cánovas".

El verdaeru núcliu dela mañana estuvu quandu la banda onró colas sus notas la memoria'l poeta.

Momentu de silenciu en recuerdu a Gabriel y Galán

Eno tocanti ala representación las letras en estremeñu, Los Retoños participarun con unus delos sus mayoris que echó angunas las poesías de Gabriel y Galán comu la de Sibarita. Más tardinu salió Cruz Díaz, poeta de Casillas de Coria i biembru del OSCEC, que dedicó una otra poesía en estremeñu, no al d'El Guiju namás, sino tamién otrus escrivientis delas nuestras letras en tós estus añus comu Juan García García o Pablo Gonzálvez i a los d'agora.

Cruz Díaz a recital

La guinda la pusu Ángel Martín, con 86 añus, tamién veníu del norti, de Pescueça, pos decramó los versus de Varón comu naidi más que él sabi hazel, desmentandu alos assestentis un añu más. En abaxandu del ecenariu, los "bien hechu" i "assín se hazi" abraçarun a Ángel.

Ángel a recital Varón
Las adatacionis musicalis de Pepe Extremadura alegrarun al púbricu entremediu i a lo últimu con Sibarita i El embargo. Tamién recitó en estremeñu Luis Martínez Terrón, escrivienti tan muchas vezis premiau.

Esti añu el omenagi a Gabriel y Galán á arrecuperau una mijina más dela su essencia literaria i del pesu l'estremeñu del que, esperamus, aiga gozau ayel el púbricu. El OSCEC contó cola presencia de varius delos sus biembrus i colavoraoris, que comu púbricu o delantri d'él s'encargó de divulgal lo que antañu hizu Gabriel y Galán colos sus versus. Paque naidi diga endispués de Caçris que:

¡Allí no se jabla,
de esas cosas ni en ellas se piensa!
N'más que se jaci comel confituras,
melcal vestimentas,
dirse a los cafesis,
dirse a las comedias
y palral de bobás que no valin
ni siquiá una perra.

Dendi el OSCEC agraecemus la participación ayel d'aquellus que, descarecíu el abexinamientu i arrochaus, supun rendil ena nuestra lengua con sentimientu i reziúra omenagi al Pairi las letras en estremeñu, José María Gabriel y Galán.

Prensa:

No hay comentarios:

Publicar un comentario