sábado, 21 de abril de 2012

El OSCEC ena presentación d'El Festivalino

Ayel mañana tres biembrus del OSCEC assistierun ala presentación d'El Festivalino en en el Gran Teatro de Caçris. 

En ella s'asseñaló la importancia la colavoración dun puebru pa organizal un eventu d'essi jeitu. El alcaldi Pescueça, José Vicente Granado espricó el pograma colas actuacionis, actividais i participacionis. 

Dendi la Fundación + Árboles, Andrés Rodríguez, cuyas primeras palabras huerun el primel versu la poesía de Cruz Díaz Cómu empuxa la huerça dun puebrinu se pusu en valol el patrimoñu natural cola su propuesta de ponel arvus autóctonus duranti se haga el Festivalinu. La idea es que, en estandu Pescueça en el ponienti, quandu assopri el airi de Portugal, esti dirá pa salienti cargau del ossíginu dela arvolea pescoçana.


El OSCEC quea agraecíu al mentaeru que hizun los organizaoris i tamién pola oportunidá de palral alguinu dela nuestra associación i dela nuestra colavoración en el eventu paque lo recadara la prensa. Dispués de la presentación, al presienti l'OSCEC dendi RNE lo entrevistarun paque leyera el poema La huerça de Pescueça de Cruz Díaz inclusu nel cartel d'El Festivalino:

Cómu empuxa la huerça dun puebrinu,
cómu empuxa la genti de Pescueça,
uníus dendi los pies ala cabeça
pa luchal pola fé del su destinu.
Se llama esti poel Festivalinu,
mentandu d'esti puebru su grandeza,
que espabila de golpi la pereza
pa tenel estu siempri de continu.
P'atilval del huturu las vereas,
vien el Festivalinu del presenti
i en él dimus tós juntus de carea.
Ai que echal ena tierra la simienti
paque la sementera plontu sea
un puebru que consigui lo que sienti.


No hay comentarios:

Publicar un comentario