viernes, 18 de mayo de 2012

El OSCEC en Val-de-Rosas (El Carcavosu)

Ayel el OSCEC anduvu en el Centro Agroecológico Demostrativo de Val-de-Rosas, en El Carcavosu. Dendi'l ayuntamientu El Carcavosu mos conviarun a assestil ala jorná de Iniciativas Agroecológicas i participal en ella dandu una chalra a tentu la nuestra coltura.


Entrá a Val-de-Rosas dendi El Carcavosu


Praça de Gabriel y Galán
Lleguemus a El Carcavosu i a continación mos endilgarun angunus vezinus pal lugal de Val-de-Rosas, puebru de colonización que está allí cerquina. Era en Val-de-Rosas andi se hazía velallí la jorná i andi se hallava el CAD (Centro Agroecológico Demostrativo), que no era otra cosa que las escuelas viejas del lugal repuestas pa acogel chalras, encuentrus i estudius i divulgación a tentu la agricoltura sustenibli i junta'l qual se hallan los güertus ecológicus.



Rétulu la praça
Mos acibierun con amabilidá ala puerta'l CAD i dispués que mos presentemus, huimus a vesital el lugal. Mos susprendió gratamenti vél cómu la praça'l puebru se llamava de Gabriel y Galán i que'l nombri las callis eran de froris. Val-de-Rosas es un puebru típicu de colonización, de arquitetura modernista, praça con portalillu, igresia ampia, abreviaerus i depósitu.


Huenti abreviaeru


Campanariu la igresia
Dispués que bandeamus el puebru, entremus alas chalras. Cuya suspresa mos estuvu en oyendu las ventajas dela permacoltura i la importancia la osservancia i el ciclagi, sigún Charo Muriel.

Melisa i Máximo a esprical los trebajus del CAD
Dispués que ella palrarun a tentu las esperencias del CAD de Val-de-Rosas, l'apricación las nuevas técnicas de coltivu alos güertus del propiu centru i los particularis.


Ismael junta Alberto Cañedo, alcaldi El Carcavosu
De siguía entremus musotrus. Ismael dio la chalra El bastiol la coltura estremeña que tuvu mu buena acogía entre'l púbricu i los organizaoris. El tiempu de coloquiu hue más que'l dela propia chalra, ondi las opinionis i apreciacionis los assestentis abarbarun de ná que s'acabó la ponencia: ideas comu las de que está a vulgarizal-si lo tradicional, el beneficiu que trai la diversidá coltural comparanti ala biodiversidá o que no es tantu evolución, sinu introspeción coltural, polo que avía que mual los enfoquis que están ogañu ena sociedá...  

Tamién, a tentu la lengua se dixu cómu mos tienin mal concenciaus a tentu de cómu hablamus, del dañu que á hechu la educación en esti espetu i del comprexu los estremeñus a palral comu lo hazin los nuestrus agüelus. Preguntarun, por fin, pola norma, polos dicionarius, pol comu enfucionava el OSCEC.

Dispués dun coloquiu produtivu, enllenu de ideas costrutivas i pulantis, uvu una chalra a tentu la renta básica, siendu esta la que arrematava la jorná.
Gallineru con choçu reciclau
Invernaeru ecológicu
En acabandu el tiempu de chalras, por mé de Alberto, Máximo i el restu de pressonas que trebajan enos güertus del CAD, mos anduvun enseñandu las estalacionis (gallineru con choçu hechu de materialis reciclaus i barru, navis d'adobi, invernaerus, vatis secus) i las senaras ecológicas.






Albertu a dal endilgus a tentu los cultivus


Los vatis secus


El CAD
La jorná hue una delas más produtivas alas que á assestíu el OSCEC eno tocanti ala nuestra coltura. Las ideas i la muación el pensaeru que está a envernecel tuvun ayel tardi las mejoris prevas. Que otra manera de poel vivil en Estremaúra, de poel vivil d'Estremaúra i de gozal-mus cola nuestra coltura es possibli, ayel se vidu, s'entendió i se sintió. 

Dendi las eniciativas pa poel mual el tratu la tierra i el avíu económicu en el sentíu original del términu, ata el luchi pola recuperación i comunicación los valoris tradicionalis que, guardaus ena coltura de trasmissión oral, conduran la essencia de poel vivil de manera adatá i con equilibru, descareciendu los despalmis, los desbalagus i los endividualismus que se generan en una sociedá ca ves menus social, muestran que las muacionis que están a cuajal-si nel pensaeru de bastanti genti estan siendu pa ahilal por buen caminu. 

Por essu quantis que bregamus polo que mos rehiervi i vemus lo que se puei hazel con tan poquinu, mos rehundi tantu ca passu dau que sentimus que essa es la verea pola que avemus d'ahilal.

No hay comentarios:

Publicar un comentario