martes, 15 de mayo de 2012

Mapa lingüísticu d'Estremaúra

Colas abriguacionis que se llevan hechas dendi la Comissión de Lengua i el sostribu la estoria d'Estremaúra, el OSCEC á entangau un mapa en que s'asseñalan las lenguas que essistin amás delas prencipalis palras. 




Los criterius pala hechura'l mapa son lingüísticus i estóricus. Los arrayus son prossimantis, enque dan buena idea de cómu ai que entendel las lenguas en Estremaúra.

Aballandu cola vieja partición dialectal de altu, meiu i baxu estremeñu, las nuevas envestigacionis empuntan pa una destraci de ponienti a salienti eno que toca al estremeñu. Las variedais más ocidentalis conservan más la gramática i el léssicu estremeñu que las orientalis, que se muestran más castellaneás. En estuviendu renti a Portugal, las palras estremeñas ocidentalis están menus agarrás pol castellanu i án sabíu condural mejol los ocidentalismus léssicus i gramaticalis. La parti oriental, tamién estórica i lingüísticamenti estremeña, á perdíu rasgus lingüísticus sigún s'ajorra pal sul.

Tocanti al portugués rayanu, están asseñalás las prencipalis arias ondi estóricamenti sigui conociendu-si dicha lengua. La fala, ena creencia de sel una lengua hueraparti del troncón galaicu-portugués, se colorea de manera destinta al portugués.

A tentu'l castellanu, el destraci correspondi quasi que en toa su totalidá cola Estremaúra castellana lingüísticamenti. El castellanu d'Estremaúra es, comu muchus sabeis, destintu del de Castilla, tuviendu una infrujencia mu importanti del leonés, amás duna fonética conservaora.

Esperu que sea aparenti palos que están a aprendel estremeñu i palos que quieran echal-si una idea de cómu está compuesta Estremaúra ena destensión delas lenguas aquí palrás.


3 comentarios:

  1. Me paji argu marru, nel.norti nel Valli el Herti se jabra nu solu n'Piolnal, pol ehempru Barrau i Cabreru, puebrus hundaus pol Piolnalegus, aluegu tamien se jabra en puebrus comu El Rebollal, Tornu. Tamien me paji que ena parti sul nu se jabra ya n'Estremeñu, paeci la parti mas castellana i angunus laus cone acentu o espresionis andalucis. Na más, assina opinu Un salúu dendi Piolnal

    ResponderEliminar
  2. Comu pon más parriba es verdá que pal sul las palras andan más castellaneás i hata andaluzeás pa angunus laus, peru essu no les quita el passau estremeñu i que la genti contri más mayol retenga una tupa de rasgus. Yo tamién me paici que el'aria leonesa puei sel que se destienda o se destendiera más, peru hata no vestigá-lu no se puei izil de ciertu. Lo que izis d'El Xerti es mu interessanti, averá de dil muandu el mapa hormi vaigamus hiziendu más hallaúras.

    ResponderEliminar
  3. joel, esqui han pegau un tahú bien cohonúu nel norti i sobri to nel Valli, que se jabri en Caçris i Baahó ciá i nel Valli no, me paji cuantu menus raru.

    ResponderEliminar