domingo, 9 de septiembre de 2012

Día d'Estremaúra en Miajás

Letreru de Pescueça
Letreru de Miajás
Ayel celebremus el día d'Estremaúra. Los sitius en que el puebru era quien festejava, onrarun cultu ala virgin de Gualupi, otrus comu en Montiju, ala patrona local. En otrus comu en Ceclavín, Pescueça o Escurial los vezinus compartían sartenis de migas, pucherus estremeñus o carni assá. Por desgracia, en muchus otrus puebrus, esti día es un día normal, ondi no se dexa de trebajal ni siquiera...


Sin embargu, en el coraçón de Las Vegas Altas, en Miajás, el Día de Estremaúra hue bien sonau. La banda de música, associacionis, grupus de bailis i particularis celebrarun la su identidá de estremeñu con música, cánticus, banderas, poesías i mucha lengua estremeña.



Dispués delos correspondientis cultus religiosus ena ilesia modernista de Gualupi en Miajás, al son delos tamboris i trompetas miajaeñus i allegaus desfilamus ondeandu la nuestra bandera. 



Desfili


Los balconis luzían con alegría la tela que arropa esta tierra i la genti, en revolutu, ahilava con ánimu ata la praça. Boinas de puntu conos coloris verdi, brancu i negru, mesmu faldas, lazus i combinacionis de ropa imitavan los nuestrus coloris polas callis de Miajás.


Passu pola parti vieja




Muchus vezinus se pusun el hatu estremeñu. Las mugeris llevavan pañuelus coloríus al ombru con alajas, o pañuelus más cenzillus ala cabeça, otras con brusas brancas i faldas, otrus con sombreru i chalecu...
Letura la concejala
En llegandu ala praça, la concejala'l ayuntamientu leyó unas palabrinas i seguíamenti entonamus el inu a Estremaúra mentris que hiçavan la bandera.
Hiçandu la bandera
Alogu los biembrus l'associación coltural Pablo Gonzálvez subierun al ecenariu pa dizil el inu en estremeñu, siendu el segundu añu que suena en Miajás essa versión más aparenti pal puebru.
Inu d'Estremaúra en estremeñu
El presienti l'associación, Bienvenido Gutierro, echó una discursinu a tentu la condición de estremeñu. Dispués acompañarun versus en estremeñu i castellanu de socius i particularis.
El Maestru
Pa cerral la fiesta, el grupu La Dehesilla, enque la calol era mucha, bailó tres xotas mentris vezinus i curiosus se divan arrimandu a ve-lu. Los zagalinus, que no se resestían a bailoteal tamién, eran injustamenti assujetaus polos pairis, no huera cuentu que le estorvara al son de pies del grupu.
Grupu La Dehesilla
Dispués, vezinas del puebru convidarun a ducis ala puerta el ayuntamientu. La decoración de banderas i hatu tradicional no era lo únicu. Una vezina de Miajás muestrava con satisfación los sus trebajus de bordura del tragi miajaeñu ala ventana dela su casa.
Bordaus


La mañana aguzava la calol sigún diva passandu, apretandu los chalecus i molestandu los pañuelus i gorras, peru l'alegría de poel celebral a Estremaúra en buena compaña, con bailis i cantus i poesía i desfilis era tan huerti que el suol no era lo suficientimenti castigosu comu pa disfrutal del nuestru día. Esti es el segundu añu en Miajás i una buena retolá de genti acudió, gozandu-si de vivil ondi vivin i de hazé-lu ca día con el su eshuerçu común.

Pa vel el reportagi fotográficu de Toni Alcarria, dela Revista de Miajadas, achuchai aquina.

No hay comentarios:

Publicar un comentario