domingo, 7 de octubre de 2012

El OSCEC en el arradiu

Ayel mañana el OSCEC estuvu mu presenti nel pograma Rincón Extremeño (Radio Unión Cataluña). Duranti se palró ena segunda ora tuvu relación con el OSCEC. Manuel Trinidad, colavoraol usual del pograma, anduvu pusiendu las entrevistas que hizu a Carlos del Sol, vocal del associación, i al presienti Ismael Carmona.

Ismael palró delas actividais que hazi el OSCEC i del casu Melanie. Carlos anduvu palrandu a tentu dela associación Huéyebra Kahtúa, pionera ena divulgación i norma pal estremeñu, i dela repercussión que tuvu la revista que editavan Luh Papelih ai quasi 20 añus.



Amás á prencipiau el apartiju dela lengua estremeña que daquí palantri vá a hazel Ismael en el propiu pograma, palrandu en estremeñu a tentu de palabras i frasis dela propia idioma, pala genti conocé-las i gastá-las. Sedrá la primel ves que el estremeñu cuenta con un apartiju enteru en estremeñu en el arradiu. Las palabras i frasis d'ayel huerun: colorín, silgueru, presta, artolana, estal tó por matas i por roçal i cogel malas vozis.

Poeis oyel o descargal-vus las entrevistas i la palramenta en estremeñu achuchandu en esti atillu, a partil dela segunda ora de pograma. 

Amás, án criau el grupu El Rincón Extremeño en Facebook, ondi los oyentis puein ponel los sus pareceris i si quierin colavoral en el apartiju del estremeñu sugiriendu palabras o comentandu.

No hay comentarios:

Publicar un comentario