domingo, 21 de octubre de 2012

VIII Día de la Comarca de Sierra de Montánchez

El OSCEC sigui a divulgal la coltura estremeña. Por segundu añu, acuímus a Botija, esti viagi concidiendu con el Día de la Comarca Sierra de Montánchez. En él recordarun tamién el passau vetón del lugal con actividais i vesitas guiás a Villas-Viejas. Passacallis, conciertus, chalras, talleris, bailis i estalachis compretarun un día d'entretenencia pa tolos provincius i forasterus.
Recebimientu delos vezinus delos puebrus dela comarca
 Enque a primel ora dela mañana avía niebra ena tola parti aquella i hazía fríu, dendi bien templanu la genti prencipiava a animal-si bailandu i cantandu pa entral en calol. Ena praça, la regolfa palrusqueava i oyía los cantis delas mugeris que en colrus estavan a bailal.
Passacallis
 Bien tardíu escomençó el passacallis delos puebrus. Zagalis vestíus con el hatu vetón desfilavan al son del tamboril de Txebe: La Çarça, La Torri, Val-de-Fuentis, Montanchi, Botija, Sierra-Fuentis, Ruanis... i assín los puebrus tós que son parti dela comarca ahilavan pala praça ondi la genti i las autoridais esperavan.
Letreru nel ayuntamientu
 La genti s'arrehazía pa poel passal los desfilantis: zagalis, tamboreru i embanderau subierun al ecenariu ondi los políticus echarun el su palramenta.
Zagalis a enseñal los letrerinus

Praça Botija achiporrotá
 Los estalachis arrematavan los últimus detallis pa luzil los sus produtus. El OSCEC acolocó el suyu ena propia praça ondi espusimus estrumentus musicalis tradicionalis, los nuestrus librus literarius, DVDs i una jarrina pa recadal palabras que los diva a escusseteal escrivían. Algunas comu sostribal-si o arrihazi-ti cayerun drentu.
Postura del estalachi del OSCEC
 Pa otras praçuelas i callis, los artesanus i vendeoris estremeñus destendían enas mesas i enos suelus las sus pieças: cenachus, xabonis, miel, alajas, artesania de barru, pañuelus de cien coloris, chalecus i chambras, bebías, librus... Tó junta la arquitectura populal botijeña que es una delas más curiosas i bien conservás.
Estalachi de xabonis

Estalachi d'alajas

Pañuelus

Estalchi d'alforjas

Cerveza estremeña hecha en Villa-Nueva del Fresnu
Estalachi del OSCEC entangau
 Namás dil-si las autoridais, el ecenariu prencipió a enllenal-si de música. El grupu Alféizar repassarun el repertoriu tradicional estremeñu i tocarun sonis pocu conocíus. Dispués Txebe tocó sonis charrus, estremeñus i leonesis ata la meyudía.
Grupu Alféizar a tocal
 En el ayuntamientu, Manuel Trinidad hizu una esposición ondi espricó alos assestentis los origin las lenguas estremeñas i el repartu lingüísticu d'ogañu. No faltarun muestras oralis comu gravacionis del portugués de Cedillu ondi una vezina espricava los enfarinhamentos o testus literarius recitaus. La genti, gustosa reconocía muchus delos sentimientus alos que el Manuel hazía referencia ena palramenta.
Manuel a esprical las lenguas estremeñas
 Pa arrematal, Cruz recitó sentíamenti el su poema Palrandu de reziu n'estremeñu que se llevó el vitu del púbricu.  


Los alcuesqueñus dierun la norabuena alos palraoris quijiendu que pa una próssima ves palral del estremeñu nel puebru d'ellus.
Púbricu assestenti


Alogu, ahuera nel estalachi, Cruz s'enlió a tocal cona su alcordión sonis estremeñu que la genti cantó i bailó con alegría i divertimentu.
 Dispués que merendamus i dimus una vuelta al puebru pa vel los estalachis delos demás, aballamus pa vesital las ruinas de Villas-Viejas. No dexan de pasmal al vesitanti los murus rezius de piera ni la belleza incontenibli dela dehesa ena que s'encuentra, atravessá pol ríu Tamuxa.
Muru defensivu del castru vetón

Costana del castru

Valli de Tamuxa

Viviendas an pie del cerru

Conseñas de callis i viviendas ena parti alta

Aballandu
El día que passemus entre botijeñus i compañerus del OSCEC truxu esperencias mu buenas pal estremeñu. Dendi Sierra-Fuentis, Alqüesca o Talavera la Real recramarun la presencia, estudiu i divulgación del estremeñu i la coltura propia. Las mayoris mos felicitavan po defendel la lengua, dandu-mus la norabuena pol hablal bien estremeñu, ala pal que l'alegría que trasmitin los sonis dela gaita i el tamboril i l'alcordión relumbravan enos ojus dela genti. Enque la jorná estuvu llena de barullu i desembarahusti por causa del haci d'actividais que avían, el OSCEC cumprió cona su lavol de divulgación por mé del estalachinu, delas chalras, delas músicas. Ni los quilometrus ni la niebras mos quitarun de dil ayel más que a defendel lo nuestru, a aprendel alos demás a defendé-lu.

No hay comentarios:

Publicar un comentario