domingo, 6 de enero de 2013

Omenagi a Gabriel y Galán 2013

Esta mañana el OSCEC á rendíu un omenagi especial a Gabriel y Galán. Angunus biembrus dela associación mos acerquemus an pie la estauta del grandi poeta a acordal-mus dela su literatura.


Estauta de Gabriel y Galán con un quairu que la representa
Desquitandu los achiperris que mos truxu el Matía, poca á síu la presencia dela coltura tradicional en esta mañana. El omenagi aprencipió velallí alas 12:00, sigún estava proyetau.
Achiperris del campu i dela vida cotidiana antiga


El encargau dela presentación hue el bregaol Matías Simón, presidenti dela Asociación Cultural Amigos de la Estatua de Gabriel y Galán, quien pidió prencipial con un padrinuestru ala memoria delos defuntus. 

Matías a inagural el actu
Dispués delos correspondientis agraecimientus i deveris estitucionalis, la mañana s'enllenó de muchachinus premiaus con el concursu, cuya modalidá en estremeñu lleva añus arretirá por causa del pocu interés de professoris (i dela sociedá en general). Dendi colegius de Caçris i lugaris cercanus, los muchachinus subían a arrecoger el su premiu i a leel el testu que le llevó ala su reconocencia.


Una delas premiás
Otru delos premiaus a leel la su poesía

Entrecalaus divan saliendu angunus delos recitaoris, ya veteranus en el omenagi. El primeru en salil hue el tíu Angeleti, dendi Pescueça, que esti añu no mos recitó en estremeñu, pos echó La Pedrada, sin quitá-li un átimu de sentimientu, almirandu otru añu más alos assestentis. Hue, curiosamenti, una delas pocas poesías gravielanas que se sintierun alo largu dela mañana: pos ca ves ván tuviendu menus pesu las poesías del omenageau.


El tíu Angeleti a recital con reziúra
Angeleti, dixendu, que no precisava de arrimal-si muchu, porque se l'ascucha bien, emprencipió cona huerça i sentir ala que mos tien acostumbrau. Es unu delos pocus recitaoris d'aquella Estremadura que s'aprendía mejol las poesías del Gravielinu que qualquiera oración d'igresia.
Angeleti ya quasi acabandu La Pedrada
El púbricu se diva arremolineandu al reol dela estauta, acupandu la parti pandi mira el poeta, dexandu la parti trasera i dela su gocha ala banda monicipal i ala tómbola.
Entre premiu i premiu salían algunus recitandu, siempri en castellanu, alguna cosina cona que demuestral que la poesía no está muerta en estus días i que poetas i aficionaus, escrivientis i aspirantis se encuentran en esta crassi d'eventus.
En llegandu las 13:00, el silenciu s'estala an pie dela estauta i las frautas dela banda tocan un lóbrigu son en recuerdu de Gabriel y Galán.
Densiguía, con el ánimu de Matías, Joaquín García-Plata Quirós, ermanu del rezientimenti enfenecíu Rafael,  filoestremeñu nietu de Rafael García-Plata de Osma, envestigaol dela coltura estremeña, palró un ratinu, dixiendu que ván a dedicá-li un día en marçu ena Alqüesca que tanta coltura le dio.
Joaquín a dizil unas palabrinas
El cantol Pepe Extremadura cantó El Embargo en compaña delos muchachinus premiaus que assujetavan angunus delos aperius que truxu el Matías.
Pepe Extremadura
Ya en acabandu, i quasi que ala terminación (si mos descuidamus, ni palramus) el presidenti del OSCEC echó unas palabrinas en omenagi al poeta i alos estremeñus, animandu-lus a briegal pola nuestra tierra.
Ismael a palral
Cerró el encuentru Juan José Martínez, un montijanu d'adoción, que vinu convidau pol OSCEC a echal unas poesías. Recitó una propia: Abuelo, ¿y qué? que causó mucha almiración entre los assestentis que lo estuvun felicitandu ata un buen ratu dispués d'acabal.
Juan José, recitandu una poesía propia
I arremató con Sibarita, que no poía faltal en un día comu esti.
Juan José a echal el Sibarita
El omenagi, bastanti más largu (entienda-si, lexu) delo que se pretendi, está amenuyendu el espetu dela coltura tradicional i del patrimoniu oral. Las poesías de Gabriel y Galán án passau sel parti dela acarrea oral tradicional en Estremadura i en esti día es un buen momentu pa recordal a essus recitaoris que, en aprendiendu-si essas poesías de chiquininu, entovía s'emocionan en echandu-las o en oyendu-las. Son pocus los que ván queandu i, comu tolas cosas en custión tradicional, se está queandu sin siguioris que arrecojan el testigu. Apenas la Associación Coltural Pablo Gonzálvez convoca certámin en estremeñu i la genti nueva ca ves apareci más rehazia a estas cosas i delos que escrivin, animaus por professoris i familiariaris, lo hazin namás que en castellanu. 

Por segundu añu seguíu, de no sel pol canti d'El Embargo de Pepe Extremadura i la participación del OSCEC, el estremeñu no tien representación anguna. No es un poblema dela poca acetación del estremeñu namás en eventus púbricus, quandu menus en capitalis, sino dela falta de promoción i sostribu por aquel cachinu dela sociedá que á de arrebullil los assuntus provincius, pos tienin la ceguera essa de contribuíl más alo forasteru que alo propiu. Que estu es un poblema social se vei en que muchus án síu los que dierun la norabuena a a Juan José i a Ismael polas sus palabras, pressonas emigrantis que ora de mayoris án vueltu a Estremadura, otrus que simprimenti aprecian el aluçón i la huerça dela lengua estremeña. Avuelinus que están viendu impotentis que los nietinus i los más nuevus se descarecin de tolo que tenga que vel cona su tierra, vítimas dun mundu locu i arrepiau, pos án perdíu las referencias del su puebru estremeñu.

No hay comentarios:

Publicar un comentario