domingo, 14 de abril de 2013

Corónica del OSCEC en el Festivalinu 2013

Por segundu añu, el OSCEC aballá palas tierras d'Alagón, cerca delos Cuestus, al puebrinu de Pescueça. La mañana mos salió buena, no hazía ni calol ni fríu, de má que mos pusimus ala sombra, pa acarral-mus dispués, ena siesta, al son del tamboril. 

Ena praça ya estavan a apreparal el ecenariu i las associacionis i vezinus pescoçanus s'afanava en avial ca qual los sus estalachis, acolocandu con esmeru buchetas de barru, pañus bordaus o el calderu pa frital unas frores o guisal unas migas. Cruz Díaz, el nuestru sociu en aquellas tierras, mos ayuó a assental el estalachi, el santu i los achiperris. Vicenti, el alcaldi, açogau polos preparus i los orarius, mos dixu que teniamus una ora d'ecenariu palo que uviera de hazel. Proyetemus el ordin de salía, mientris que tós alreol divan assentandu-si i acibiendu los primerus vezinus i moçus que divan estus días pa Pescueça a esparigil-si i disfrutal cona música i la compaña. I es que, velaí, Pescueça, con tolo chiquina que es, es escapás de ofrecel tres días al añu de conciertus, talleris i concenciación ambiental i rural comu pocu puebrus sabin. Moceá folastera i provincia, vezinus pescoçanus, portagerus, corianus o torrojoncillanus s'ajuntan en essus días pa echal comedias, compartil palramentas entre ducis caserus, oyel música que vien de tolas partis i reponel la dehesa paque enverneça i no se quei aburría por causa delos ganaus estancus o dela falta de cudiu. Naturaleza-coltura, un binomiu que en Pescueça enfunciona tolos añus.


El Txebe a tocal
 Alas 12:00 apareció el presidenti del OSCEC, con el hatu d'estremeñu, en el ecenariu a presental las actuacionis que dendi l'associación divamus a hazel. Entró densiguía Txebe con nuevu repertoriu cona gaita i el tamboril atrayendu conos sonis la genti que estava esparramá pola praça i las callis d'alreol i que prencipiavan a allegal.
El tíu Angeleti a recital ala su mugel
 En metá dela entrepetación del Txebe, el tíu Angeleti i Juan José Martínez rompierun en el ecenariu pa recital poesía lindas i sentías. Enque lo hizun de manera entrevolá, primeru hue el tíu Angeleti que recordó la poesía que l'echó ala su mugel por mó delas boas d'oru. El púbricu tortearun bien huerti esta entrepetación.
Pubricu a sentil las poesías
 Dispués entró el montijanu de acogía, Juan José Martínez. Echó la del Sibarita con unus añidíus d'él. Sin esperá-lu, enantis dela segunda poesía contó unus chistinus que huerun un risoriu ena praça. Arremató con, velallí, una poesía del Cruz causandu que dambus a dos, recitaol i poeta, dispués se susprendieran: unu por no sabel quién era el autol i el autol por sentil essus versus en boca duna otra pessona. 

Juan José a recital
 Siguierun los ermanus Miguel i Elisa Herrero Uceda que leyerun un cuentinu titulau La Corrobla, que perteneci al su próssimu libru de relatus en estremeñu, el qual esperamus vel plontu. Sedrá otra delas pubricacionis en prosa dela literatura en estremeñu conas que contribuíl ala conocencia dela lengua entre más genti.
Miguel i Elisa leyendu La Corrobla
 Aluspués el Txebe arremató con unus sonis estremeñus, atillandu cona siguienti actuación en el mesmu ecenariu. Mentris, la genti pola praça caraveava, s'echavan unus quintus, visteavan los estalachis o s'echavan retratus.
Genti ena praça a oyel el Txebe

Pescoçanas a palral estremeñu

Moçus visteandu el Prencipinu
 Los moçus se acercavan al estalachi a echal una visual alos librus i a rellenal la cartulina de palabras estremeñas. Librus comu El Prencipinu, los Requilorius o los dela Nueva Literatura que saca el OSCEC eran leíus en vos alta con interés i suspresa pola genti. Uvun quien mos preguntó por un dicionariu pa enseñal-si a palral estremeñu, otrus s'alegravan de que estemus a bregal pola nuestra coltura oral. Los ermanus Herrero firmavan librus, nusotrus palravamus conos que s'acercavan a perguntal i assina divamus passandu la mañana entre parecelis, froris fritas i música.
Zagalis de Zangaena
 El ecenariu tardó pocu en enllenal-si conos biembrus del grupu riolobeñu Zangaena. Mostrarun un buen repertoriu de sonis dela partis norti de Caçris conos bailis de zagalis i moças.
Bailis delos riolobeñus Zangaena

Escriviendu en estremeñu
 El estalachi al cabu la mañana, quandu la música se ensuveció conos sonis estremeñus de Zangaena i los ingresis de Richard Hewitt, cobró interés entre la genti moça que ajorrava ala praça. Piornalegus, hurdañus, portagerus, pacensis, veratus o d'otras partis de Estremaúra, bien moçus, raceavan pola praça i ca ves que se recordavan duna palabras propia estremeña acuían a escreví-la ena cartulina de Qué palabrinas conocis en estremeñu? Se recadarun unas 150 palabras estremeñas que pondremus en un próssimu endilgu en esta mesma página.
Ismael i Juan José

Estalachis

Calapachu antiguu
Cacharreru
 Pola siesta, que no avía conciertus, improvissamus nusotrus unu nel propiu estalachi. La gaita del Txebe i los tamborilis que llevamus i la vos de Fran Herreru mos sirvierun pa alegral la tardi alos que passavan pola praça.
Biembrus de OSCEC i amigus
 Que se puei concencial del patrimoniu estremeñu drentu delas propias manifestacionis que esti da, enas sus hormas modernas o enas antiguas, es algu que amus vistu que se puei hazel. Cuyas suspressas que estuvun en vel la genti nueva a arrellenal la cartulina con palabras, al torrojoncillanu que mos dio la merienda dixiendu que siempri palra en estremeñu, peru que si es precisu hablar en castellano lo hazi con igual correción, en una verata que mos palrava dela palabra afechal en aquellas tierras, del afán d'Andrés por renoval la dehesa, del pacensi que dis que las garachas son los alpergatis, de cómu comentavan esperandu la comía que Estremaúra es un paraísu palos propius estremeñus, del tíu Angeleti dixiendu que era pescoçanu delos que no se movió del puebru, del osservatoriu astronómicu que apreparan los ermanus Herrero Uceda aprovechandu la bondá del nuestru cielu o delas mairileñas que preguntavan pola chambra. Anégotas toas drentu del caraiti, dela essencia, que asseñalan el interés i la precupación que ai entre la genti de tolas generacionis pola coltura provincia i que apenas que aiga un trebaju cordinau poemus concedel la conduración duranti muchus más añus delo que realmenti mos hazi estremeñus.





No hay comentarios:

Publicar un comentario