sábado, 8 de junio de 2013

El OSCEC en el III Festival Romano de Barbañu

Un otru añu más, el puebru de Barbañu celebra el su passau romanu enas sus callis. Por causa dela rezienti abertura del assentamientu de Torre-Águila, villa imperial romana, Barbañu lleva tres añus festejandu esta importanti hallaúra i con ellu acordandu-si dela su estoria.


Calle la Virgen ayel tardi
 La tardi se presentava mala: los ñublus divan i venían i los vendeoris estavan al trebolillu, unus agachapaus enas lonas, otrus destendiendu el almaçón i amarrandu los palus i otrus conos estalachis mediu armaus.
Santu del festival destacandu-si nun balcón
 La calli la Virgen, que ajorra dela ermita ata la praça, está adorná con letrerus, sábanas con el santu, enseña del festival, i los puestus luzían nombris latinus que'l curiosu diva perguntandu a vel qué poía sel.
Panarium
 Pola calli los zagalinus i no tan zagalis, hateaus de soldaus, de diosis, de escravus o de reis romanus se passeavan. Algunus mayoris divan tamién con el hatu romanu, peru eran menus, pos ata la media nochi no tocava la su representación.
Vitrarius


Tonstrina


Estalachi dela 'indagatio' con el ayuntamientu al atrás


Letreru con el santu del festival ena praça
 En el salón d'actus colturalis, la genti prencipiava a acuíl, púbricu i autoridás, que precuravan polos unus i los otrus pa ponel-si al día i entrecambial ideas.
Muestra de trebajus
 La sala ofrecía un esposición conos retratus del festival passau i amás un tabreru andi se mostrava el trebaju delos muchachinus pal letreru del festival.
Trebaju d'unu delos zagalis


Inaguración por Amnis Callis
 Denseguía entró el alcaldi, Juan Manuel Ambrona, a entroduzil las chalras asseñalandu la importancia del festival ena vida de Barbañu.
El alcaldi de Barbañu, Juan Manuel Ambrona, a palral


Púbricu, participantis i alcaldis alo primeru
 La primel palramenta la dio Ángel Luis Gallego, professol de latín i griegu en el IES Vegas Bajas del Montiju. Estuvu palrandu a tentu del proyetu Comenius que tienin con otrus estitutus d'Uropa i ahuera d'ella pala gravación duna película. Algunas delas ecenas se gravarun, velaquí, en Barbañu i en Méria, cuyamenti en latín. Assina, el sitiu arquiólogicu volvió a cobral vida en siendu ecenariu dela película, mesmu el ríu (Guadi)Ana sintió otra ves el latín por cima dela corrienti delas sus aguas.

Ángel Luis emprencipiandu la esposición



 Le siguió el alcaldi dela Puebla, Juan Antonio González, que palró a tentu del ahinchonamientu turísticu delas Vegas Baxas, hiziendu mentación al proyetu de barcu que quierin de ponel en Badajós pal visiteu del ríu.

Juan Antonio espricandu el vencijón turísticu
 Alogu Ismael Carmona, presidenti del OSCEC, dio una chalra a tentu dela toponimia delas Vegas Baxas i cómu valoreandu essi patrimoniu oral estremeñu se puei ancançal a entendel otras ramas comu la Lingüística, la Estoria o la Arquiología.
Ismael Carmona alo primeru dela chalra
 La toponimia generó un coloquiu bastanti interessanti andi el púbricu llamó l'atención sobre el origin del étimu de Barbañu i el su senificau o cómu se repitin los topónimus en lugaris andi án bistu hallaúras. Una mugel, provincia delas Casas de Reina, se recordó del topónimus delos Pareones i la Hoya en el sitiu ondi oi está el teatru dela ciá de Regina. Con ellu s'asseñaló la importancia de conselval la lengua ena que están espressus essus topónimus, es dizil, el estremeñu, i assina entendel mejol lo que tenemus al reol. Dela escuela tallel La Encina, dispués que acabemus las palramentas, s'alamentarun de que le huera gustau sabel delos nombris más allegaus de lugal pa assina be-li anombrau más provinciamenti, pos nombris comu el del Bacinete que se mentarun le pareció bastanti más curiosu i aparenti.
Assestentis alas chalras
 La última chalra la dio el envestigaol i debujanti arquiológicu José Manuel Jerez Linde, amás, coronista de Guaxira. Mos palró a tentu delas vasijas encontrás en Torre-Águila cona técnica de barbotina i cómu puein ayual-mus a entendel la procedencia delas familias assentás en essa villa enos primerus tiempus de vivienda.
José Manuel Jerez ena su ponencia


José Manuel Jerez duranti la chalra


Púbricu
 Al tiempu de acabal, el alcaldi hizu una reconocencia alos zagalinus barbañerus pol su trebaju i hizu la entriega duna piçarra con el retratu dela villa romana alos participantis dela chalra. Las mugeris de Amnis Callis regalarun tamién alos palraoris una enseña cona el santu del festival, el brochinu hallau ena villa. Amás, dispués en el vinu d'onol s'entrecambiarun ideas i proyetus entre los assestentis ala chalra.

 Ahuera llovía a ratus, peru ala final se contuvun las nuvis i la genti s'arrochó pa passeal polos estalachis i salil a vel el teatru que echarun los niñus barbañerus.
Calli la Virgen enantis del teatru delos zagalis
 Ena praça, en el ecenariu entangau pa ellu, los zagalis al barullu alo primeru, más assentaus endispués, aparecían sigún el guión. Se relatava el origin de Roma, de má que diosis i reis míticus estuvun encarnaus ayel tardi en essus zagalinus que arrancavan la simpatía del púbricu.
Zagalis en el proemiu la obra


El rei Rómulu
Esti festival, amás de servil d'encuentru entre genti empicá ala estoria o la arquiología, es en verdá el momentu en que Barbañu, tras dun añu duru, da avau alos aginaerus. Es una manera de ajuntal-si los vezinus, de hazel que los muchachus prencipiin a conocel la su estoria, la estoria del su puebru i de valoreal el patrimoniu que los estremeñu tenemus, tangibli o no, paque ellus el día de mañana se gozin con él. Dendi el OSCEC queremus agraecel al ayuntamientu de Barbañu, alas mugeris de Amnis Callis i ala Asociación de Amigos de la Villa Romana de Torreáguila la oportunidá de poel compartil con barbañerus, montijanus i otrus paisanus delas Vegas Baxas una muestrina del nuestru patrimoniu oral i animá-lus paque esti festival crei tradición i sea referencia entre los festivalis i fiestas romanas en Estremaúra.

No hay comentarios:

Publicar un comentario