lunes, 9 de septiembre de 2013

Día d'Estremaúra en Miajás 2013

Ayel los estremeñus celebremus el nuestru día, sigún lo asseñala el calandariu. En Miajás el celebramientu hue memorabli, ondi lo estremeñu arroeava la villa comu namás el sentimientu de pertenecel a esta tierra puei hazel.
Azulejus cona Morenita

Crus dela ermita

 La mañana prencipió cona missa estremeña pola virgin de Guadalupi alas 10:30. Las moças i mairis hateás d'estremeñas assestían ala ermita.
Maxi Gutierro ala puerta la ermita
 Mucha genti s'apreparava ena barrera delos Ciruelos pa prencipial el passacallis. Hateaus con chalecus, pañuelus, chambras o alforjas, las banderas conos coloris estremeñus se destendían delos palus buscandu el airi que puea voleá-las en el desfili.
Biembrus dela A. C. Pablo Gonzálvez
 Las muchachinas luzían las sayas bordás estremeñas con chalequinus i lazinus coloraus, mentris que las mairis buscavan la tela dela bandera paque la llevaran junta la banda de música.
Muchachinas con el hatu estremeñu

Moceá cona vestimienta estremeña

Banda de música de Miajás
 De ná que la missa acabó, la genti diva cogiendu el su sitiu ena marcha, encabeçandu la bandera i la banda de música, mentris que en rebullón los coloris apagaus delas vestimientas antiguas s'entremesclavan conos hatus modernus. Esti añu, a diferencia del passau, uvu mucha más genti i mucha más tamién vestíus conas ropagis tradicionalis.
Presidenti del OSCEC
 La marcha ajorrava la barrera buscandu la calli Real, mentris que los sonis dela banda i las xotas rebumbavan polas callis miajaeñas.
 Las fachás del puebru destendían la nuestra bandera con ergullu, asseñalandu que esti era el nuestru día, el delos estremeñus.
 El alabán lo cerrava el grupu Virgen de la Soledad de Malpartía, quien con alegris xotas i más alegris moças passeavan regenteandu conas sus vestimienta cona almiración delos caminantis.
 Formi la calli Real se diva estrechandu, las caravas tamién lo hazían al son delas músicas. Los edificius más antiguus se sonreían en viendu-mus passal i los granus delas toças brilleavan comu si hueran de marmu.
Pola calli Real
Renti al palaciu
Junta'l Bartolo Extremeño



Casas conas banderas
 Dispués que alleguemus ala praça, los moçus de Malpartía s'arrancarun a bailal entri que s'aviaba el ecenariu i se proyetavan las actuacionis.
Moçus a bailal
 Denseguía, deque las autoridais prenunciarun el su discursu, s'entonó el inu oficial d'Estremaúra sigún alevantavan una grandi bandera an pie dela Casa Consitorial.
Alevantamientu dela bandera
Los biembrus dela Associación Pablo Gonzálvez subierun al ecenariu a dedical unas palabras i versus estremeñus ala nuestra tierra. El primeru en palral hue el presidenti, Bienvenido Gutierro, quien leyó un discursu delantri delos sus vezinus.


 


Siguierun los versus estremeñus que recitarun biembrus dela associación comu Maxi o Benjamín, cerrandu la participación Ismael Carmona quien leyó la poesía Estremaúra de Cruz Díaz Marcos.
Maxi Gutierro a recital

Aluspués la praça s'enllenó de sonis estremeñus que la Associación Folk Virgen de la Soledad de Malpartía de Caçris i el grupu La Dehesilla de Miajás s'encargarun de bailal.

Enque la calol era mucha al solatu i la genti buscava el chisqueru delas parelis, muchus se refrescavan el gañón conas cervezas del quioscu o enas tavernas dela praça. Mentris, en el ecenariu el Candil, la Rondeña de Castilblanco o el Fandango Oliventino espantavan tamién las caloris.
La Dehesilla
Ala terminación delos bailis, s'esparramarun grobus conos coloris dela bandera i con palabras estremeñas escritas en ellus dendi el balcón del ayuntamientu.
Grobus
Los zagalinus i los no tan zagalis apañavan del suelu los grobus unus i los más de más albeliá los entallavan en el airi demientras las mugeris passeavan cona bandejas arremangás de ducis tradicionalis.

Si los miajaeñus tienin un hondu sentimientu d'estremeñidá, velaí que lo puímus vel ayel. Peru no es cosa dun día namás: las diversas associacionis colturalis del puebru velan por guardal las tradicionis i la estoria en continus actus, celebramientus o chalras. En un puebru andi ai coltura i la genti participa se crían cosas tan lindas comu la mañana d'ayel, gracias al eshuerçu, el afán i la querencia polo nuestru.

No hay comentarios:

Publicar un comentario