domingo, 10 de noviembre de 2013

II Semana del Colono en San Gil

Estus días se celebra la segunda semana del colonu en San Gil. El letreru, llenezitu d'actividais, quiel trael la memoria dun puebru que en siendu nuevu convién que no se pierda. Varius biembrus del OSCEC mos acerquemus alas chalras d'ayel ondi se palrarun custionis mu interessantis sobre el patrimoniu delos puebrus nuevus.

Rosetón dela ilesia de San Gil
 Inaguró el actu l'alcaldessa de San Gil, Ana González i acontinación hue la presentación del primel palraol, José Ignacio Sánchez Sánchez-Mora.
Ana González a inagural el actu

Enantis de prencipial
 Sánchez Sánchez-Mora anduvu a dal datus tocantis al proyetu idráulicu del Plan Cáceres que cogi las vegas de Alagón i Xerti. Palró delos tipus de tierras, los caminus, cequias i presas que se hizun en númirus.
José Ignacio
 Aluspués, Esther Abujeta Martín hizu un passeu pola arquitetura provincia delos puebrus de colonización arreparandu en el casu de San Gil. Casas d'obrerus i colonus, destraci delas callis, inseñus de fachás, partis del puebru, arquitetura dela ilesia...
Esther a oyel la presentación

Púbricu assestenti

Diapositiva con retratus de edificius de puebrus nuevus
 Pa arrematal las conferencias, Moisés Bazán de Huerta palró sobre el patrimonio artísticu delos puebrus nuevus asseñalandu la dificultá del arti modernu i la acetación dela genti, la autoría d'algunas obras i los talleris andi se fabricavan. Amás truxu una muestra en retrataúras delas obras dela ilesia de San Gil comparantis alas de otras delos puebrus nuevus del norti cacereñu sobre el inseñu del alumbraeru, las vidrieras i los imagin delos destintus santus.
Moisés a prencipial la chalra

Detalli delas obras artísticas delas ilesias de puebrus nuevus
 Ala terminación uvu una interessanti carava ondi el púbricu perguntó a tentu delas conservación del patrimonio arquitetónicu, de qué perteneci al puebru i qué al párracu, los abrevaerus de piera de granu o el dineru que le costó al estau hazel estus puebrus.
Tien importanti que los colonus i ijus d'ellus assistan a esta crassi de chalras pa enlial-si a cogel un concenciamientu del su puebru i la coltura que en ellus s'á díu desenroandu a trocu de no perdel las señas que la mestura i la novedá d'estus sitius tienin. Quiciá se echó en falta un tratamientu más antropológicu dela custión delos puebrus nuevus enas chalras, aprovechandu que estavan muchus delos vezinus de San Gil i otros puebrus nuevus, amás de gentis de puebrus viejus. Peru a pocu a pocu, devería de dil-si hiziendu encuentrus ondi la desinquietú i las ganas de compartil vivencias entre abitantis de puebrus nuevus huera el puntu central, llevandu comu guías los destintus andilis dela coltura d'estus puebrus. Dendi aquí la norabuena al ayuntamientu de San Gil por estus actus i que sigan a repetí-lu tolos añus pala genti delos puebrus nuevus entendel más dela su estoria.

No hay comentarios:

Publicar un comentario