sábado, 21 de diciembre de 2013

La Cigarra Extremeña en Miajás

Ayel tardi, l'Associación Coltural Pablo Gonzálvez reconoció la lavol literaria dela logrossaniega Luisa Durán, conocía enos andaris literarius comu la Cigarra Extremeña. L'associación quixu hazel un autu de reconocencia a esta escreviora pola carrera literaria i de esparramamientu dela coltura estremeña por España. Los versus án síu recitaus en muchas capitalis i entovía siguin sonandu polos puebrus, siendu, dispués de Gabriel y Galán o Chamizo, l'autora que mejol supu encontral las palabras pa espressal el sentimientu delo estremeñu i comu aquellus autoris, de manera bilingüi, empreandu lo mesmu el estremeñu que'l castellanu.

El Bienvenido i la Luisa enantinu d'empençal
 Librus comu Vivencias, El canto de la Cigarra, Mi tierra o los sonetus del últimu Poesía sobre un lienzo son verdaerus cantaris duna estremeña sentía a cosas cotidianas, recordanças i cosas echás en faltas delo vivíu.
La Rita a presental el autu
 La reconocencia a esta autora prencipió alas seis corrías en el palaciu Obispo Solís de Mijadas, andi familiaris, biembrus dela Associación Coltural Pablo Gonzálvez i arrimaus s'ajuntarun pa mental las cosas d'Estremaúra en versu. El autu prencipió cona presentación que hizu la Rita, logrossaniega de nacencia comu la Luisa.
 Densiguía prencipiarun los recitalis, ondi teatrinus i versus dela Cigarra ressonarun pola bóveda dela sala del palaciu, arrecogiendu las candilás que metían las cámaras delos destintus canalis de comunicación.

El Javier i la Elsa con "La feria"

El Bienvenido con "Rosarillu"

La Elsa con "El anciano"

El Esteban con "Señol méicu"

La Paquita con "Soleá"

La Rita con "La Virgen del Consuelo"
El Ismael recitó el romanci propiu dela Molinera

Púbricu
 Dispués del recital, la Luisa mos clissó conas sus palabras de querencia pa Estremaúra, asseñalandu ella propia que llevó el nombri dela nuestra tierra andiquiera que diva. Entremediu, diva floreandu versus i estrofas dela sus propia obra pa acabal cantandu junta tol púbricu el Redobli!
La Luisa a echal una palabrinas

A recital

La Rosi a dizil "Mi Petra"
 Se cerró el autu cona entriega duna praca en nombri dela Associación Coltural Pablo Gonzálvez i varius ramus de froris por parti dela propia associación i de familiaris.
La Ma. Ángeles entriega la praca ala Luisa

Palabras d'agraecimientu palos biembrus dela associación

La ija le regala froris emocioná por sentil su mairi dispués de tiempu en el estrangeru

L'Associación Coltural Pablo Gonzálvez
Hue una tardi cargá de sentimientu, comu ca ves que la poesía en estremeñu i los recitaoris miajaeñus cain drentu duna mesma sala. Ayel cona presencia dela Luisa Durán el sentil estava a frol de piel, queandu-mus pelihincaus conas sus estrofas. En saliendu del palaciu, la Luisa mos contava la manera de galral que tenía la mairi i que ella pon enas sus poesías. S'alegró de que la simienti del su eshuerçu vaiga abarbandu entre la genti nueva, que comu los del OSCEC, sostribamus, defendemus i usamus la coltura oral que mos legan los más viejus. Por essu dendi aquí damus la norabuena al Bienvenido, pol hotrileu i las aginacionis d'estus días i el trebaju que hazi entre los miajaeñus pa lleval las letras en estremeñu al su puebru, siendu en esta ocassión cona presencia dela propia autora, la Cigarra Extremeña.

No hay comentarios:

Publicar un comentario