lunes, 6 de enero de 2014

Omenagi a Gabriel y Galán 2014

Un otru añu más celebremus an pie dela estauta de Gabriel y Galán en Caçris la obra d'esti autol que tantu pesu tien ena literatura estremeña, el nuestru Vergiliu delas letras en estremeñu.  Comu ca añu, Matías dendi la sus associación hazi la promovición dela memoria Gabriel y Galán i premian el escrevieru delos más nuevinus. Esti añu, enque salió nublau i con bastanti fríu, la genti que s'ajuntó a oyel el recitaeru de grandis i chicus hue bastantita demostrandu que la poesía uni.

Pepe Extremadura agradeciendu el premiu
 El primeru en dizil unas palabras hue Pepe Extremadura, quien acebió un premiu pola su lavol musical drentu i huera dela nuestra tierra. I densiguía prencipiarun a ressonal los versus de Gabriel y Galán i no púu tenel mejol esmiençu que Sólo para mi lugar en boca dunu delos mejoris recitaoris que tien ogañu Estremaúra, el pescoçanu tíu Angeleti. S'arrochó con esta poesía cargá de verdá que dixu sin trocal un versu sin paral-si, espasmandu el púbricu pola energía con que la mentava i la huerça que se desprendía delas sus palabras.
Tíu Angeleti con Sólo para mi lugar
 Endispuesinu i, entrevolámenti comu lleva passandu angunus añus, los premius correspondienti alos zagalinus i la letura delos sus poemas se sucedían entre las participiacionis del recitaoris i poetas localis o folasterus.
Primera delas premiás en el concursu infantil de poesía

Púbricu presenti

 Cruz Díaz susprendió por sel el primeru en recital en estremeñu i agradeciendu la lavol que hazemus los que bregamus paque la lengua delos nuestrus avuelus siga viva, echó las poesías de Ocurrencias i Palrandu de reziu en estremeñu.
Cruz Díaz Marcos a recital

Pepe Extremadura i la su música
Pepe Extremadura alegrava el recital conas sus versionis, esti viagi del Embargu, en compaña delos zagalinus premiaus.


Rosa Perona i El Silenciu

Las participacionis del OSCEC siguían. Ismael Carmona, dedicó unas palabras a tentu de Gabriel y Galán i la querencia que tuvu alos campus i puebrus salmantinus i estremeñus i sobre la importancia de que los estremeñus miremus pol nuestru patrimoniu.
Ismael Carmona a palral
Aluspués, el montijanu Juan José Martínez salió a recital con emoción los versus de Varón, alevantandu la sonrisa alos oyentis conas ocurrencias del Gravielinu i la buena recitación de Juan José.
Juan José a recital "Varón"
El miajaeñu Bienvenido Gutierro recitó la poesía Rosarillo de Luisa Durán, quien tuvu por parti dela associación Pablo Gonzálvez una reconocencia el mes passau.

Antonio Calero, professol d'estoria, echó una poesía propia aprovechandu el tema del embargu del conocíu poema omónimu de José María.
Por pedimientu del púbricu, Juan José volvió al estaribel a echal la poesía Viejo, ¿y qué? que alegró los coraçonis del púbricu cona gracia con que esti montijanu d'adoción cuenta el tema dela viejura.
El autu lo cerró Pepe Extremadura con una canción que sacó dela costumbri de tocal las campanas dela ilesia de Gualupi pa reconcilial-si las parejas que rompían los cacharrus, essu sí, al son de ranchera.
Biembrus del OSCEC: Carlos del Sol, Ismael Carmona, Bienvenido Gutierro, Daniel Gordo i Cruz Díaz

Juan José Martínez, el tíu Angeleti i Ismael
Un otru añu más vemus que el estremeñu tien una presencia más huerti, con recitaoris i poetas que por mé del OSCEC s'ajuntan pa decramal ena lengua en que Gabriel y Galán pubricó "El Cristu Benditu". Con tó i con essu, vemus que'l testigu no passa alos más nuevinus quien componin en poesías castellanas i quien sin ayúa de maestrus i pairis descarecin los versus ena lengua del puebru. Por essu, el OSCEC oi dio el apitíu paque las nuevas generacionis defiendan la coltura estremeña con el sostribu de tola sociedá.

No hay comentarios:

Publicar un comentario