sábado, 1 de febrero de 2014

El OSCEC en Malpartía de Prasencia

Ayel tardi el OSCEC cogió el pendigui i ahiló pa Malpartía de Prasencia a demostral una ves más que'l estremeñu está vivu. Cuya suspresa que mos estuvu al vel tanta genti a protegel el chinatu i el serraillanu en un mesmu lau!

El actu organizau por ADEME tuvu una acogía más que clara. La casa de coltura s'enllenó de chinatus, serraillanus i cacereñus i d'otrus sitius apreparaus a passal una tardi d'ermanamientu i ajuntaus pol una mesma cosa: la lengua


Púbricu a cogel assientu i a acutá-lu
 El actu hue bien curiosu, sina mesa de ponentis ni ná d'essu. En verdá era un escenariu aparenti a un salón, con estresillu i butaconis, mesillas i alfombra: una manera de presental el estremeñu comu quien toma un café an cá el vezinu i d'ajuntal-mus cona genti sinas distancias frías delas conferencias.

Entrá al actu
 Las primeras palabras las dierun los alcaldis de Malpartía, Marcelo Barrado, i la Serraílla, Gelasio Sánchez, quien ajuntarun la coltura comu ermanamientu entre puebrus vezinus.

Primeras palabras
 Dispués dela presentación, prencipió el turnu delos palraoris, siendu el primeru dela chalra Antonio Salvador Plans, estoriaol dela lengua. Hizu un repassinu delas mentacionis del chinatu i el serraillanu enos testus i estudius, asseñalandu la importancia dela seña Gregoria Canelo.

Presentación al Antonio Salvador
 Dispués dela su palramenta, densiguía prencipió a palral Carlos Canelo con un discursu bellu andi destacó velallí la precisión de conserval la lengua comu un valol social. Aluspués del discursu estuvu a mental las características del chinatu, pusiendu angunus exemprinus del su trebaju lessicográficu.

Presentandu a Ismael
 Dispués salimus nusotrus, a palral en estremeñu. El Ismael dio unas enteracionis del enfuncionamientu dela associación i mentó el parecíu del chinatu i del serraillanu. Amás estuvu a palral dela precisión de conserval la lengua pa entendel la ralidá estremeña i embilmal el processu de inadatación en que vivimus.
Ismael a palral
 La última en palral hue Pilar Cobos, dela associación el Duendi. La suya hue la palramenta más sentía de toas, pos hizu recordança dela vivencia dendi chiquinina con el serraillanu: comu de siempri se palró el estremeñu, que es algu eredau i que convivía con el castellanu sin mestura ata la muança enque la genti prencipió a mestural lenguas pol comprexu pusiendu en peligru la propia identidá.

Quiciá que lo más sonau huera el momentu dela carava i las preguntas. Dendi l'associación el Duendi s'interessarun por sabel por qué no hazi más la UEx pala conservación del estremeñu. Antonio Salvador respondió que agora está cona defensa dela fala i que no puei palral pola nuversidá en esta custión. Alogu preguntarun pol Gregoria Canelo, ondi el propiu Antonio Salvador asseñaló la su precupación pola lengua i que l'aginava no tenel un escrevieru aparenti pa represental los sonis del chinatu, mentris que Carlos Canelo palró d'ella comu una buena pessona ala que los vezinus acuían pa acebil consejus. Uvu un entrevenimientu del chinatu Antonio quien dixu que él no s'abexinava ni s'abaxava quandu hizu la mili en Valladolís i le dizían que palrava mal, respondiendu que él palrava mu bien, sin faltal con naidi. La última pregunta la hizu Juan Pedro Domínguez, de Delitosa i biembru de Extremadura Unida que assestió al actu, que porqué essa continación del estremeñu ena parti delas Villuercas. Ala pregunta respondió el Ismael asseñalandu que el estremeñu es continuu i que la Mairoñera no es la rareza en essa parti, sino Trugillu, pos enos puebrus dal reol se sigui a palral estremeñu, mesmu enos que están pegandu alas Villuercas i que con una norma lingüística comu la que se está apreparandu dendi el OSCEC se sentirían identificaus los palrantis de muchus laus al vel que es más lo común que lo que desaparta.
El Néstor a mental una palabrinas enantis dela penícula
 Uvu un descansu andi convidarun a café i se púu palral con angunus delos biembrus dela associación de Amigos del Habla de los Chinatos que reconocierun que entovía se sigui palrandu chinatu i genti de mediana edá lo conoci i es escapás de usá-lu. 

Tras del cafelinu, prencipió la penícula, no sin antis unas palabras delos encargaus de gravá-la i derigí-la, quien namás sabin que arrecogel felicitacionis, mentacionis i premius comu el de Reyes Abades.


Retrataúra final tras dela proyeción la penícula con el Cabrerín i el Néstor
Dispués duna tardi comu la de ayel vemus que el estremeñu cuenta con un sostribu social enormi, ondi generacionis, nuevas i viejas, están dispuestas a hazel de tó paque no se pierda, dendi recoja de palabras ata aprendel a escrevil la lengua. Por mé delas associacionis i por mé dela juntança i el compromissu es possibli que una lengua puli enantis de dal el vencijón las almenistracionis correspondientis. I es que el estremeñu no es una lengua muerta, comu nos dizin dela nuversidá, ayel lo comprovamus entre serraillanus i chinatus que se sienti más viva coscienti de sí propia que nunca.

Dendi el OSCEC queremus agraecel a ADEME la convidá i alos vezinus chinatus la acogía i las felicitacionis que tuvimus. Es entre los propius palrantis i ijus d'ellus, con el su sostribu i ánimu, ondi vemus que el proyetu del OSCEC está ahilandu palantri, pos lo que hazemus no es ná dessajenu d'ellus, tolo contrariu es compartil lo que tenemus i entangá-lu pa poé-lu compartil conos que vengan detrás.

No hay comentarios:

Publicar un comentario