lunes, 10 de marzo de 2014

Corónica de V Festival Valdelacalzada en flor

Dispués dunus añus enfuncionandu, poemus dizil que'l festival folclóricu de Val-dela-Calçá vai cogiendu vuelu bastanti. Ayel hue el día del puebru que llaman La Vara ondi s'ajuntó naturaleza, música, tradición i lengua en un día de fiesta i divertimentu comu pocus ena comarca. La concidencia conas muestras carnavaleras enos puebrus vezinus no hue un impedimientu pa enllenal-si el genti con catervás de viageras i hormal-si revolutus de genti enas callis i ena praça.
 Junta los Arcus dela Praça, s'assitiarun los estalachis embaxu duna carpa abierta ondi artesanus enseñarun lo mejol delas sus manus. Prencipiarun templanu i palas 10 dela mañana ya estavan los estalachis mediu entangaus: buñuelus, floris, roscas, prestiñus, dulçainas de tolas hormas atrascendían conos sus goloris pol puebru.
 Dispués del passacallis pola parti norti del puebru prencipió el festival de música. Convidau pola agrupación Araval, Ismael Carmona, presidenti del OSCEC hue el encargau de presental las atuacionis velallí nel ecenariu entangarilau an pie dela torri dela ilesia.
Zagalis de Araval
Pola mañana era el festival infantil, ondi los zagalinus de destintus puebrus enseñarun con albeliá las danças más aparentis pa ellus: La uva, El Corridiñu o la Xota dela Garganta entre otras. 
Dispués dela inaguración por parti del alcaldi i el repartu delos premius de decoración floral por callis i fachás, Ismael presentó el festival i el primel grupu. Los primerus en bailal huerun los zagalis vareñus i montijanus de Araval, siguiendu Las Llares, que vinun de Torrergás, los sanvicenteñus La Besana i los meritensis de La Antigua.
Coru d'Araval

Guiaoras de Las Llares

Guiaoras de Las Llares

 Entre atuación i atuación los tamborilerus dela Asociación Santiago Béjar de Prasencia tocavan sonis estremeñus an pie del ecenariu. Ellus huerun los que guiarun los dos passacallis que uvun entre los barrius más adornaus del puebru.
Púbricu de pola mañana

La Besana

La Antigua
 Ena carpa, renti una delos salierus delos jardinis dela Praça, los dos biembrus del OSCEC que assistierun entagarun un estalachi con una muestra de librus en estremeñu. Hizun una incuesta i recadarun palabras delos que daremus norti en un otru endilgu.
El Daniel i el Ismael nel estalachi del OSCEC

Genti ena carpa pola siesta
La carpa hue el sitiu de comerciantis i artesanus. Avían muestras d'artesanía i venta de produtus artesanus: ducis caserus, carpintería, cacharrería, manualidais, cerveza, quesus...

La Rocío nel su estalachi

Artesanu dela maera junta varias pieças d'él

Cacharrus de barru

Estalachi delos quesus

Estalachi delos cervezerus de La Jara

Talla de maera

El Juan i el Cristian en el estalachi delas manualidais

Muchachas en el estalachi de abalorius

A escrevil palabras estremeñas en el nuestru estalachi
 Las atuacionis de pola tardi prencipiarun alas cincu corrías, dispués del passacallis pola calli La Puebla, San Pedro i La Luna. El Ismael presentó el primel grupu delos adultus que venían de Çafra, El Castellar, unu delos grupus más huertis del sul estremeñu que llevan a envestigal i divugal el patrimoniu musical estremeñu dendi 1983.
 Alogu subierun al ecenariu otra ves los de Las Llaris, esti viagi cona vestimienta montermoseña que dierun alegría i colol conos Sonis de Montermosu i mos engamonitarun conas rondeñas.

 Entremediu subierun los tamborilerus a tocal unus sonis entri que se apreparavan los dos últimus grupus i arroeaus de micrófonus dierun los últimus toquis al tamboril en esti festival.
 El tercel grupu dela tardi hue Savia Viva, de Coria, otru delos grupus con más tradición en Estremaúra (dendi 1978). Entrepetarun cantaris tan sonaus comu el portageru Que si quieis? o la Xota de Coria. Dispués tuvimus la oportunidá de palral con Pedro i Jaime del grupu que mos anduvun a esprical la tarea envestigaora, la deferencias musicalis entri puebrus, las adatacionis i algu dela estoria musical del valli de Alagón.
Savia Viva
 Arrematarun el festival los de Araval que llevan enfuncionandu dies añus. Asseñalamus la entrepetación de Las Ganancias i la buena coreografía andi demostrarun que ca añu que passa ván pulandu i amejorandu.



Dispués de quasi que 12 oras de atividais comu rutas, passeus en tren, muestras d'artesanía i música estremeña hue un día con el que los vareñus án de sentil-si satisfechus, pol trebaju delos agricultoris enas parcelas que permitin seguil uviendu ectarias i ectarias de frutalis multicolol, delas associacionis colturalis i artesanus por ajuntal-si en esti día pa enseñal que la coltura estremeña está viva i alos organizaoris dela Universidad Popular i del ayuntamientu por acontinal un otru añu más con una fiesta que vai siendu referencia en Estremaúra. Gentis de Prasencia, de Medina, de Valencia'l Ventosu, del Montiju, dela Puebla, de San Vicenti, de Çafra, de Méria, de Coria, de Torrergás, de Montanchi... i sabi dios de quántus puebrus más s'ajuntarun ayel domingu pa celebral la primavera entre los sonis estremeñus. No uvu música namás, sino que la nuestra lengua estuvu bien presentera gracias alos biembrus del OSCEC que púun lleval en essi día el estremeñu a ressonal polos micrófonus i a vel-si polos letrerus. Hizimus gavilla conas agrupacionis de baili i la genti s'emoció al sentil las palabras conas que se criarun i que perdierun por bexinu i imposición. Mos queemus con el gustu de sabel que ai querencia i voluntá de seguil conas tradicionis estremeñas i que trebajandu pola nuestra coltura se concedin sensacionis comu las que ayel se produxun ena Vara. Dendi aquí damus las gracias a tolos vareñus i de huera que hizun possibli un festival assín i especialmenti al Rafa, de Araval, pol convidal-mus a palral en estremeñu, ena hincaera de que dispués de sigrus enfochá enas casas, la nuestra idioma vá arrecuperandu la posición púbrica que mereci.

No hay comentarios:

Publicar un comentario