domingo, 23 de marzo de 2014

Página nueva dela FEF bilingüi

Ayel mañana la Federación Extremeña de Folklore celebró la assamblea general ordinaria i estrordinaria de socius en Malpartía de Caçris pa hazel balanci delo hechu el añu passau i pa dal la oportunidá alos grupus que lo pidierun de ajuntal-si o sel biembrus de prenu derechu. 

La mañana estuvu tupía con un ordin del día con muchus puntus enos que tenteal custionis comu lo del festival infantil, las cuentas, los nuevus grupus, organización interna, convocatorias, etc. De soslai se tocó el dañu que está hiziendu ala música tradicional estremeña las modas del flamencu i las sevillanas.

Tamién se presentó la web nueva dela Federación que s'encargó de hazel el secretariu Pedro García. A ella contribuyó de baldi la Comissión de Lengua del OSCEC, quien entre el Daniel Gordo i el Ismael Carmona cantearun pal estremeñu gran parti del conteníu dela nueva página. Ena presentación dela página, el Ismael, en castellanu i en estremeñu animó alos grupus que respetaran i promovieran tamién la lengua estremeña drentu delos cantaris, que la esparramaran, tuviendu mu buena acoja polos representatis delos destintus grupus que ayel estuvun en Malpartía.


El resultau es una página con títulus, cargus i apartijus bilingüis castellanu/estremeñu, siendu assina la primel página bilingüi de difusión ampria, pos se trata del puntu de reunión i escaparati de associacionis i grupus de corus i danças de toa Estremaúra, consultá polos biembrus i tamién por qualquiera que quiera sabel más dela nuestra coltura tradicional.

Pa pisteal la página nueva dela FEF achuchai aquí.

No hay comentarios:

Publicar un comentario