sábado, 19 de abril de 2014

Inolviabli chalra en el Castañal

Ayel el OSCEC anduvu pal Castañal de Ibol a dal una chalra que palos que huimus sedrá inolviabli. La tardi cona calol, una mijina menus que antiel, s'agarrava al cochi, que alternandu guías i rueas se hizu 400 quilometrus pa allegal a unas delas tierras más agarvás i bravías d'Estremaúra: los Iboris.

Ilesia del Castañal
 El Castañal es delos puebrus más grandi dela comarca i ayel estava de fiesta, en una semana coltural i enllena de atividais aprovechandu la Semana Santa. Formi mos aprofundavamus ena sierra el paissagi era más barrerúu, más cerrau, más lindu, pondi corri el'agua en cá recuéncanu i la fauna i el ganau te susprendi al revolvel las curvas. Las retortuñas no son muchas i ai mu buena carretera, peru essu s'acaba en llegandu al Castañal, que tien barreras i retortuñas comu las Uertas i Torrojoncillu juntus.
Casa tradicional
 El puebru está mu repuestu, enque entovía se vein angunas casas tradicionalis enas callis prencipalis i enas praçuelas i rinconás. Los nombris delas callis siguin siendu los tradicionalis i muchus arrecogin la toponimia del términu, comu el dela calli del Postueru.
 Dispués de bebel-mus un cafelinu con el Luismi, biembru del OSCEC allí, ahilamus pal soterrañu del ayuntamientu que es ondi estava el salón coltural. Echamus el bandu pol megafonía en castellanu i en estremeñu pa enteral la genti dela ora dela chalra i el monólogu. Alos dies minutus ya estava el salón enllenandu-si enantis de arrematal los preparus: el proyetol, estava una mijina biscorneau.

Casa tradicional
Letreru asseñalandu la chalra


Apreparandu la chalra

Genti acuyendu
 Alas 18:40, dispués de asperal dies minutinua ata la sala enllenal-si, el señol alcaldi echó la presentación dela chalra, inagurandu assina los autus de pola tardi.
El alcaldi a presental-mus
 La chalra la dio el Ismael entre el púbricu con un micrófonu. Muchus huerun las custionis que tenteó, dendi qué era el estremeñu, dándi vien el nombri de castúo ata quális son los pobremas alos que s'afrontan las lenguas amenuías.
El Ismael alo primeru

La sala a enllenal-si


 La segunda parti dela chalra se centró ena estoria delos Iboris, la relación de Talavera con Estremaúra i las características del estremeñu enos Iboris. La genti al sentil las palabras i frasis se sonreían i las comentavan formi palrava el Ismael d'ellas.
Ismael entri el púbricu a palral
 Ala terminación dela palramenta varias pessonas del púbricu preguntarun. La genti s'enteressó pola procedencia del palraol, del trebaju que hazi l'associación. Mesmu preguntarun pol dicionariu i la ortografía. Unas delas mugeris recordava cómu le reñía i mesmu le pegavan por dizil "aluego" ena escuela, lo qual, comu venimus comprovandu en tolas chalras hue i es una ralidá drentu del sistema educativu andi no se vei respetu polas lenguas tradicionalis i que, está polo claru, adenunciamus dendi el OSCEC. A cuentu d'essu mentemus el cursu que ofrecimus al professorau el añu passau pa concencial del usu del estremeñu enas aulas i de que con acercamientu comu essus de tolerancia i conocencia el abexinu i la vergüença dexan de tenel lugal enas crassis en tratandu-si del estremeñu.
Contestandu alas perguntas del púbricu
 Tamién preguntarun pola ayúa que tien el estremeñu por parti delas estitucionis i el goviernu, dendi lo qual palremus de que, enque esté recadau ena lei, no hazin por conserval el patrimoniu oral.
Pedro Cotano prencipiandu el monólogu
 La carava no púu alargal-si demasiau porque Pedro Cotano, que lleva el pograma Cotano y hundido del Canal Extremadura está en paragi de salil a desencaxal-mus las esquexás dela risa. Con un umol que se sostriba ena vida cotidiana de muchus estremeñus, trató con ironía i cachondeu la sitación del campu, el sistema de salú, la política o las vidas delas parejas sin dexal de hazel mentacionis ala nuestra chalra ca ves que poía pos tamién salió la custión del estremeñu.
Dela chova pala derecha: el Ismael, el Pedro Cotano, el alcaldi del Castañal Jesús, el Luismi i el Dani
Enas tres oras de chalra i espetáculu los castañerus aprendierun más sobre la su coltura oral, a aprecial la lengua i que no se olvíi i siga a trasmitil-si i amás con el risoriu de Cotano hue una tardi llenita de buen umol. La genti, al tiempu de aballal, dio la norabuena alos participantis i comentarun custionis delas que se palrarun. Alogu, estuvimus de carava con Cotano i el alcaldi compartiendu esperencias dela tardi i proyetandu nuevas participacionis en el Castañal viendu la acogía tan buena que tuvu entre los vezinus que enllenarun la sala ata las trancas. Pa arrematal la tardi estuvimus a conocel genti nueva del puebru que son voluntosus de usal el estremeñu enos sus negocius i de hazel tolo que estén ena su manu pa conserval la coltura tradicional. Mos huimus del puebru con una sonrisa que entovía oi sigui ena cara dispués de comproval las ganas de trebaju, de aprendel i de compartil la coltura estremeña que ai en esti puebru, desmotandu muchas delas alicantinas que se cuentan d'esta parti d'Estremaúra. El Mario, unu d'estus nuevus, dizía cómu de siempri estuvun essas sierras abitás, prencipiandu polas cuevas, los castrus, la presencia romana, mora i, naturalmenti, delos provincius serranus que llevan los sigrus i los sigrus allí. Palrandu conos vezinus vimus que el estremeñu está vivu i que lo es tantu comu lo puea sel el serraillanu, el migaegu, el coseranu o el fontanés, porque esa parti estremeña tien la coltura, el sentil i la lengua del restu de Estremaúra. Quiciá que los apontamientus dela Estremaúra leonesa i castellana aiga que ensotá-lus i prencipial a escrevil otrus que sí digan la ralidá dela coltura i la lengua estremeña. Dendi aquí agradecemus al ayuntamientu la pacencia i el ofrecimientu, que el'alma se riyera en el cuerpu conos acuerdus del Pedro, la buena compaña i carava del Luismi, del Mario i del Rulo, i dela acogía tan buena que tuvimus entre los castañerus.

No hay comentarios:

Publicar un comentario