miércoles, 30 de julio de 2014

Anhinojo folk, Remansos del Tajo

El grupu delos Inojalis, Anhinojo Folk, acaba de sacal un discu nuevu, entitulau Remansos del Tajo. Dispués de un processu largu de gravacionis i viagis, los sonis cacereñus más téntigus salin con una caliá escelenti. 


Esti grupu referenti dela música tradicional estremeña, guarda enos cantaris que sacan la essencia mesma delas alegrías i estorias que siempri se cantarun. En esti discu ai cantaris propius delos Inojalis como Las Alboradas de Boda o las Coplas de San Sebastián, peru tamién delos quatru lugaris comu el Dale, dale, dale... o el Pirulí. Dela vezina Garrobillas train El Carbonero i mesmu de más pabaxu train cantaris del Arroyu i del Casal. Pa muestra, vali un botón i tamién en esti discu ai muestras delos cantaris de quandu chicu. Amás es un omenagi al ríu que passa renti los Inojalis, Taju, al que le cantan un sentíu ¿Qué te han hecho, Tajo? que abri el discu.

Siendu un grupu comprometíu con el patrimoniu estremeñu, train tamién dos cantaris ena nuestra lengua, la tradicional de La Turruana i la delos Quintos del Casal cona letra adatá del OSCEC. Amás, el libretu está bilingüi, castellanu-estremeñu, siendu los empeçaoris en esti jeitu.


El exempru de envestigación, respetu i briega pola conservación i esparramamientu del patrimoniu musical estremeñu devi de valel pa otrus grupus, ena idea de que la riqueza musical estremeña es tan grandi que premiti l'acogía de tantus sonis i tan variaus que sedría mestel un cientu d'añus de grupus a tocal pa apurá-lus tós.

Norabuena, Anhinojo Folk. Seguí assina!

No hay comentarios:

Publicar un comentario