lunes, 11 de agosto de 2014

Chalra en Frexenal

El tupíu pograma del OSCEC pa esti fin-de-semana passau mos llevó a atravessal Estremaúra: el sábau velallí en Frexenal, pola nochi ena Garrobilla i el domingu en Malpartía de Prasencia. A pocu a pocu diré pusiendu los reportagis de ca una delas participacionis dela nuestra associación.

Calli propia de Frexenal
El sábau alas 10 el presidenti i el colavoraol José Manuel Jerez s'espetarun en Frexenal pa queal los preparus dela chalra aviaus. Al ratinu mos acibió amigablimenti el Tomás, del agrupamientu Los Jateros de Frexenal an pie dela praça d'abastus del lugal, siendu el edificiu dela calli el Rollo el que mos diva a servil pa dal la chalra.

Essapétalas en una açotea de Frexenal
 El edificiu de primerus del sigru XX es ogañu la oficina de turismu del puebru. Allí mos ayuó la muchacha dela oficina, filóloga italiana pa más señas, a estalal-mus. El hechu de estal en Frexenal, verdaera cuna del estudiu del estremeñu por sel en 1882 quandu el Folk-Lore Bético Frexnense prencipió a envestigal las variantis estremeñas del sul, desinquietava i emocionava: era un rencuentru conas nuestras raízis.
Pograma andi reza la nuestra chalra el sábau
 La chalra prencipió alas onzi corrías deque biembrus del OSCEC del sul estremeñu i vezinus del lugal divan acuyendu.
Edificiu dela Praça d'Abastus

Letreru de primerus del XX
 Ena pranta d'arriba, ena sala d'esposicionis junta la praça d'abastus, enque la calol era mucha, tamién avía ganas de palral en estremeñu. Allina, el Ismael hizu un bandeu polos prencipalis poblemas que tien el estremeñu, los mesmus que otra qualquiera lengua amenuía pa dil a pocu a pocu enhilandu ata llegal ala estoria de Frexenal i las características del estremeñu del sul.
El Ismael al tiempu d'emprencipial
 La chalra se hazía a pocu a pocu más una carava. Los fregenalerus arrepavan en varias custionis del estremeñu del puebru, comu el vocabulariu -fechar, fechaúra, alegín-, enos ipocorísticus comu panchurros o tripa-sola, el prestigiu social dela lengua delas capitalis, el conceutu del palral bien o mal o la estoria del lugal, con mentación especial ala toponimia i a Nertóbriga. 
Duranti la chalra ahilava
 Alo largu dela chalra acuyerun otrus biembrus dela associación i tamién fregenalerus emigrantis. La carava, dispués que acabó la chalra, se centró enas atividais colturalis de Los Jateros que precuran impeíl que el andaluzeu acabi por aborral las señas estremeñas de Fregenal por mé dela música, las fiestas i las costumbris. S'arreparó en el hechu dela emigración de muchus vezinus del lugal a estudial i trebajal a Sevilla i cómu pol caminu acaban perdiendu lo estremeñu i agarran lo sevillanu. Estas emigracionis por custionis d'estudiu o trebaju que suelin sel dela genti nueva has que generacionis enteras se troquin, queandu en el puebru un vazíu de coltura tradicional.
Entrevencionis del púbricu
 Por suerti, el largu caminu que llevan hechus los Jaterus has que lo estremeñu acontini en Fregenal i la precupación del Tomás, a quien agraecemus grandimenti dendi aquí la su briega paque el acolturamientu no afeiti Fregenal, premiti que encuentrus comu los de ayel sirvan pa arrebullil la concencia dela genti. Preva d'ellu es que el día 8 vesitaremus otra ves Fregenal pa decumental i divulgal la su fiesta más asseñalá, la delos dançaores o lançaores dela virgi dela Salú.
Conviti ena taverna del Nito

No hay comentarios:

Publicar un comentario