sábado, 11 de octubre de 2014

Chalra en Guaxira

El Ismael Carmona estuvu ayel tardi en Guaxira a dal una chalra a tentu del estremeñu enos puebrus nuevus endrentu del pograma dela Semana Coltural guaxireña.

El Ismael emprencipiandu la chalra
 El proponimientu era tenteal la custión del estremeñu i la su conservación en aquellus puebrus que huerun criaus pol régimi franquista enas Vegas Baxas. Pa ellu el Ismael palró del conceutu d'estremeñu, enclaró el assuntu del castúu i analizó las causas del desboronamientu i acachinamientu dela lengua en estus puebrus, dandu comu prencipalis la escuela, el serviciu milital, la emigración i los nuevus canalis de comunicación.
Púbricu duranti la chalra
 Partiendu d'ellu se llevó a cómu tó essu hizu crial un comprexu i un abexinamientu enos propius palrantis que son de continu reñíus pol gastal palabras i frasis estremeñas ena su comunicación cotidiana.
Púbricu duranti la chalra
 Duranti la chalra-carava el púbricu entrevenía conos sus apreciamientus, ideas i pareceris sobre lo que se palrava. Dendi el piqui que ai entre los puebrus nuevu i viejus en custión de lengua, teníus los viejus por mal hablados al gastal Guaxira i no Guadajira o yeu.

Ossequiu duna piçarra con el retratu de Guaxira
 Drentu delo que se pranteava, estavan las deferencias entre puebrus d'origi delos colonus i los puebrus nuevus, la imposición del ingrés, la falta de materia del estremeñu en el currículu de primaria i segundaria i la necessiá de una assinatura d'Estremaúra andi incruíl el estremeñu. Tamién se palró i muchu del comprexu i la vergüença que esprimentan los estremeñus que anda paí ahuera en Cataluña, Mairil o el País Vascu que no es ralu encontrá-lu renegal dela su tierra. Palrandu la chalra en estremeñu, vezinus nacíus en puebrus comu La Cosera, Villal-del-Rei, Abuquerqui, Talavera o Lobón reconocían comu propias muchas delas palabras i frasis comentás. Mesmu un matrimoniu dela Serena, los assestentis más viejinus que estavan ena chalra, s'emocionavan al volvel a sentil muchas d'essas palabras. Dendi el nombri populal delos puebrus nuevus comu El Alcheí, Casarenti, La Vara o Guaxira, passandu polos castigus escolaris por dizil empresta-mi el aguçalapi o aiga o el conceutu candongu de Yeulandia, los guaxireñus passarun mu buena tardi de concenciamientu i compartil el patrimoniu oral estremeñu. 
Dendi el OSCEC animamus alos guaxireñus a conserval el su patrimoniu oral i a concencial alos más nuevinus delo que están perdiendu quisiendu arrendal las costumbris i la lengua dahuera de ves de aprendel lo propiu.

1 comentario:

  1. As minhas felicitaciõs em xalimego. A lengua cua que sonho abrazando as tres falas do val de Xálima: lagarteiru, manhegu e valverdeiru.
    Abrazos e para dientri.

    ResponderEliminar