domingo, 12 de octubre de 2014

Presentación del discu "Venticincu"

Ayel nochi el OSCEC assestió ala presentación del discu Venticincu que'l agrupamientu garrobillanu Alonso de Mendoza acaba de sacal.

 La presentación aconteció ena Casa de Coltura dela Garrobilla alas 21:15, ondi vezinus, amigus i biembrus i familiaris del grupu enllenarun los assientus del salón. Palrarun varius biembrus dela associación i el concejal dispués dun vidiu conos retratus que aprimin el trebaju hechu duranti los mesis de gravación del discu. Duranti palravan, agraecierun varias vezis la calavoración del OSCEC por traduzil al estremeñu unus testus del libretu i el nombri del discu i bel hechu la presentación esti veranu del Festival el Castúo.

 Alogu endispués los tocaoris i el coru del grupu subierun al ecenariu a tocal angunas delas pieças del discu, encruíu el de Las Mayas, ondi zagalinas cantarun conas sus vozis lindas las primeras estrofas i ata angún que otru muchachinu s'echó a bailal xota allí arriba. 

Esta nochi ena praça nueva dela Garrobilla, ena carpa que án apreparau liquiamenti pal actu, los de Alonso de Mendoza ván a montal un espetáculu con coreografía que dizin sedrá una suspresa. El discu lo poeis conseguil tamién esta nochi dispués delos bailis pol preciu de 10 €. No vo-lo perdais!

No hay comentarios:

Publicar un comentario