martes, 25 de noviembre de 2014

Corónica dela chalra en el Montiju

Ayel nochi el OSCEC acuyó al Montiju a palral a tentu del estremeñu ena comarca delas Vegas Baxas convidau pola Asociación de Amigos de la Villa Romana de Torreáguila.


 Dispués de acolocal-si la genti i delos preparus delas cámaras delos destintus medius que acuyerun (La Ventana Digital, Montijaneando.com) el autu lo abrió Pedro del Viejo, presidente dela associación, quien ahinchonó ena proteción del patriomoniui material i imaterial estremeñu. La presentación la hizu José Manuel Jerez Linde, calavoraol i envestigaol i divulgaol arquiológicu. 
 La chalra corrió en el tiempu previstu. En ella, el Ismael Carmona, presidenti del OSCEC espricó los afanis del OSCEC, definió el estremeñu i enclaró las custionis tocantis ala palabra castúo. Anduvu a hazel un recorríu polos materialis oralis recadaus enas Vegas Baxas, dendi el vocabulariu ata las frasis hechas, con tablas comparativas i espricaciones. Asseñaló el hechu de que la genti nueva no tuviera interés nengunu en estas custionis i que es tarea tamién delos viejus concencial los ijus i nietus de que conoçan i respetin la erencia coltural estremeña.
Ena carava acabera, varius biembrus del púbricu, cuyamenti de puebrus nuevus, preguntarun pola costitución gramatical del estremeñu o si el goviernu estremeñu era coscienti d'estas custionis. Tamién osservarun que los ijus corrigin los pairis i avuelus, ijus con educación universitaria, i que, enque siendu pocus, sí ai una movición i un rebulliciu entre la genti nueva en custionis del patrimoniu coltural estremeñu i que ca ves la moceá vá arreparandu i defendiendu más lo daquí. El mensagi que dimus hue el de que está en manus dela genti nueva el que enverneça la coltura tradicional i que pa essu tolos biembrus dela comunidá tenemus de aportal lo nuestru, largu delos abexinamientus i comprexus impuestus por mé dela educación i la televisión.

*Retrataúras de José Manuel Jerez Linde.


 Velaquí el vidiu enteru cono palrau, hechu delos amigus de Montijaneando.com. Poeis leel el endilgu aquí. Aquina el endilgu dendi La Ventana Digital.


No hay comentarios:

Publicar un comentario