sábado, 27 de diciembre de 2014

Chalra en Guadiana

Ayel nochi estuvimus en Guadiana, puebru nuevu delas Vegas Baxas, conviaus pola Concejalía de Coltura del Ayuntamientu en el bastiol de chalras que dendi vai sieti añus se celebran en esti puebru a cuentu dela estoria i coltura d'esta crassi de puebrus.
Palraoris con el santu del OSCEC
 Los preparus i la presentación la hizu el Emilio Guerro, pessona bien conocía pola su trayetoria social en el mundu del campu.
Al tiempu de empeçal
 Palró una aparenti i sentía entrodución sobre la coltura populal, el hechu de sel ijus de colonus, los puebrus nuevus i la relación que tien la lengua en ellus, apreparandu el terrenu pala nuestra chalra.
El Emilio Guerrero a palral
 La chalra la dio el Ismael Carmona enteramenti en estremeñu. En ella palró a tentu dela reconocencia entrenacional del estremeñu, las otras lenguas estremeñas comu el portugués o el xalimegu, las mentacionis difussias en el Estatutu i la deferencia entre los términus castúo i estremeñu.
Genti enos assientus alo primeru
 A logu hizu un bandeu polas causas prencipalis del retraimientu i perda generacional dela lengua i la coltura tradicional enos puebrus nuevus, con hincaera ena educación. Pa ellu pusu d'exempru los métodus escolaris delos añus 50 i los de prencipiu del sigru XXI cona comparança de librus de testu i manualis, ena idea de que la desconocencia que tenemus dela nuestra lengua i coltura no es casual, que es a posta.
El Ismael duranti palrava
 Endispués desentressijó las conseqüencias ena sociedá estremeña asseñalandu el desaculamientu delos viejinus comu referentis dela coltura, que se vidu supuesta por otrus referentis barajaus dendi ahuera. Arrematemus con un bandeu somerinu pola lengua enos puebrus nuevus destraçandu la vista de Guadiana, con mayoría de colonus de Helechosa.
El púbricu duranti la chalra
A fin uvu una ora de preguntas i osservancias por parti del púbricu, unu delos más mesturaus que amus teníu con bastantis moçus, amás de zagalinus, mairis, pairis i avuelus de Guadiana i puebrus dal reol. Precisamenti por esta variedá generacional el descutiniu hue más provechosu i ricu, tantu que viendu que eran ya las 23:00 tuvimus de cortal por mor delos que venían de largu. La primel entrevención hue duna mairi que dixu que dispués delo que ascuchó, no volverá a reñil más alos pairis por palral comu palran. 
Otra señora asseñaló que aprendel el estremeñu diva a sel forçau, quandu en otras partis comu en Cataluña o Galicia se palrava de siempri i por essu se concedió que acontinaran essas lenguas. El propiu Emilio s'encargó de contestal que hue precisamenti por bel-mus cortau la nuestra coltura i lengua polo que paici que perdimus la memoria delo de patrás, peru que con tó i con essu la genti sigui palrandu assina en muchus laus. Con atinu dixu que es incomprendibli que defendel lo nuestru esté mal i alogu mos pareça bien si lo hazin los dahuera cono d'ellus. Endispuesinu, el Juan Pedro asseñaló lo 'políticamenti insinificanti' que es Estremaúra i que por essu atorgamus perdel las nuestras señas d'entidá. El nuestru secretariu, el Daniel Gordo, s'encargó por mé dela su esperencia comu iju de gallega de enclaral la custión. 
Un guadianeru asseñaló que penículas comu las de Buñuel criarun mal imagi d'Estremaúra palos dahuera. 
Eno tocanti a preguntas que tenía que vel cona lengua, preguntarun pola afiliación lingüística del estremeñu, si venía del leonés i sobre el escrevieru delos infinitivus con -l.
Quiciá que lo que más ánimu mos dio anochi hue sentil un señol delos que resultarun la gran dosi de moral que avía cogíu con essa chalra. Comentarius comu essi i preguntas comu las anterioris declaran la desinquietú i la precupación que ai pola lengua en Estremaúra. Que tó estu passi entre genti delos puebrus nuevus es un buen motol pa seguil bregandu polo nuestru. Dendi aquí agraecemus muchu la envitación del Emilio Guerrero a Guadiana i polas palabras que enantis i endispués dela chalra pusun un bastiol voluntosu, que qualquiera puei consejal-si.

*Retrataúras del Juan Pedro Sánchez.

No hay comentarios:

Publicar un comentario