martes, 2 de diciembre de 2014

Corónica del OSCEC en Getafi

Es la primel ves que'l OSCEC aballa tan largu. La causa era bien cenzilla, peru tamién onorífica. La Casa Regional de Extremadura en Getafe, que ca añu premia el trebaju d'estremeñus que briegan pola su tierra, mos entregó una mentación especial polos añus que llevamus esparramandu el estremeñu i el patrimoniu oral.

La Cibelina
 Julián Puerto, biembru dela Casa Regional i del OSCEC i escrivienti en el Sierra de Gata, mos acibió ena taverna dela Casa. Allina mos esperava tamién Luis Miguel Bayán, biembru del OSCEC que anda a trebajal enos Mairilis. Dispués duna merienda animosa andi palremus dela lengua i el caraiti delos estremeñus o los poblemas del campu, estuvimus a vesital Getafi. El Julián mos contava cómu muó Getafi, de sel un puebru con casas castellanas, corralis con pozus i uertas a sel la ciá que es agora. Las muacionis delos prencipalis caminus que atravessavan el antiguu puebru o las fachás de edificius, agora retificás o simplimenti caías pa hazel pisus. Angunas casas conservavan el ladrillu vistu, comu la torri dela Magdalena, ilesia prencipal.
Quairu acachinau pol pintoris localis ala puerta dela Magdalena
 Los airis crássicus del edificiu i las obras hazin del templu un sitiu d'espetu nuevu i elegantosu. Alas 9 corrías huimus palos Salones Emperador, andi se hazía la cena. Arroeaus d'autoridais, enas mesas dal reol, el OSCEC compartió mesa conos otru delos premiaus, Miguel Pozo, impresariu que calavora conas atividais que lleva hiziendu la Casa Regional. Otru delos premiaus hue, velallí, el antropólogu Tomás Calvo Buezas.
Momentu dela entriega'l premiu
 Dispués que cenamus, los biembrus dela Casa hizun entriega duna estampación alas autoridais presentis i denseguía huerun los premiaus. El premiu que nusotrus acibimus hue un quairu en relievi del escultol José Martín Calderón. Los primerus en parecel huimus nusotrus. El Julián dixu unas palabrinas de presentación, primeru en castellanu, arrematandu en estremeñu i a continación palró el Ismael Carmona. El presidenti mentó la lavol del OSCEC i reconoció que los verdaerus premiaus aquella nochi eran los viejus que supun mantenel el patrimoniu oral del que nusotrus agora bebemus i divulgamus. El discursu, toítu en estremeñu, emocionó los assestentis emigrantis que tomavan tola atención que poían.
El Dani, el Ismael, el Luismi i el Julián dispués dela rifa
Siguierun los demás premiaus, siendu memorabli el discursu del Tomás por toa una vida de trebaju polas colturas amenuías. Uvu una rifa i baili, momentus enos que puímus conocel i palral varius estremeñus que allí vivin i que están drentu dela Casa. El trebaju de Apolinar o Ángel Prieto o Pedro, el umol del aliseñu Eugenio o las caravas con serraillanus, berrocalejanus o talaverinus, el carruchau de norabuenas i ánimus alo que hazemus mos renovarun las energías i mos dierun un nuevu vencijón. Dendi aquí agraecemus ala Casa Regional de Extremadura en Getafe la reconocencia dela nuestra briega i, particulalmenti, al Julián, pol atendimientu i buen ratu que passemus el sábau palrandu d'estoria i lengua i los sus endilgus sobre la Casa i Getafi.

Poeis encontral más enteracionis i retrataúras en estus atillus:
El discursu del Ismael lo pubricarun oi en el Sierra de Gata. Poeis leé-lu aquí.

No hay comentarios:

Publicar un comentario