jueves, 18 de diciembre de 2014

El OSCEC en el colegiu Sagrado Corazón de Miajás

Ayel mañana el OSCEC i l'Associación Coltural Pablo Gonzálvez aprepararun una chalra-recital palos zagalis de 3u i 4u dela ESO del colegiu Sagrado Corazón de Jesús de Miajás. La envitación salió del'AMPA del colegiu dispués dunus días cordinandu entre associacionis i professoris el autu. 
El Ismael alo primeru dela crassi d'estremeñu
 La primel chalra prencipió a i quartu palas dozi palos alunus del 3u cursu dela ESSO. En essa chalra el Ismael palró a tentu del origi del estremeñu, las lenguas que se palran en Estremaúra, la estoria delos puebrus que passarun por aquí, rasgus dela nuestra coltura comu los carvotis, el tueru o la calavera'l conqui i la importancia de que cojan el testigu coltural delos sus avuelus, pos perdiendu essa erencia quearán inadataus ena su propia tierra i al tentu delo que digan dendi ahuera. Aluspués el Bienveníu dio unus endilguis del patrimoniu estóricu i arquiológicu de Miajás i arremató la sessión varias poesías a cargu dela Rosa, dela Mariángeles i dela Rita, sin olvial los sonaus versus de Feijóo que decramó el Benjamín.
La Rita i la Mariángeles a recital
 La segunda sessión ajuntó varius grupus de 4u dela ESO. A ellus el Ismael le hizu una entroducionzina en castellanu i alogu tolo demás en estremeñu. Partiendu de preguntas sobre qué sabían del estremeñu i adatau al su nivel, púun imponel-si en custionis importantis comu la hormación delas lenguas d'Estremaúra, la ortografía, las características del estremeñu, la relación otras lenguas, con mucha hincaera ena importancia de que se quitin los comprexus i aprendan la lengua que le quearun los avuelus.
Los zagalis de 4u
 La chalra causó bastanti revolución entre los muchachus, desajenus al palral delos avuelus, ya que púun sentil duranti media ora el estremeñu de manera oral i mesmu arrochal-si a escrevil ellus propius palabras ena piçarra o leel cachinus de testu ena fala.
El Ismael a palral estremeñu entre los zagalis
 El Bienveníu volvió a palral dela estoria i coltura de Miajás, delos topónimus i dela huélliga celta ena zona. Arrematarun poesías echás pol Benjamín, una propia dela Rita i tamién el Bienveníu echó la poesía Dendi la higuera del Florencio que hue un risoriu palos muchachus.
El Bienveníu a palral del patrimoniu de Miajás
Sobre las concrusionis que se sacan d'esti encuentru del patrimoniu oral i los zagalis d'ogañu ya palraremus en el artículu del pedióricu d'esta semana. Agraecemus al'AMPA del colegiu, sobre tó al Jesús, que mos brindara esta oportunidá de lleval el estremeñu alas aulas, enque huera namás por unas oras, pos la simienti dela golienda i el respetu ya está puesta en essi cientu de zagalis que estuvu con nusotrus.

Más enteracionis en Facebook i ena Revista de Miajadas.

1 comentario:

  1. Asin ai que dil jadiendu... enculcandu a la genti nueva la muestra palra.

    ResponderEliminar