miércoles, 21 de enero de 2015

Chalra en San Vicenti

Ayel nochi el OSCEC ahiló pa San Vicenti d'Alcántara. Dispués de conocel-mus el añu passau en Val-dela-Calçá, la genti de La Besana mos convidó a participal ena VI Semana de Folklore que apreparan. Drentu delas atividais que hazin en estus días, estuvu la vesita delos zagalinus del CEIP del lugal ala muestra de tragis regionalis o la cata i corti de jamón d'antiel nochi, arrematandu con conciertus el viernis i el sabau.


 La chalra la dimus en el Museo del Corcho, que aprepararun con assientus ena sala prencipal pa palral i esponel. La recebía mo-la dio Juanma Carillo, de La Besana, junta otrus compañerus que acababan de salil de ensayal-si.
 Cona corcha al reol i los panelis con endilgus a tentu dela saca, prencipiamus la nuestra palramenta, que prencipió palrandu de qué es el estremeñu, dóndi vien i delas otras lenguas estremeñas amenuías: el xalimegu i el portugués rayanu.
 Alogu estuvimus viendu las causa polas que se pierdin no el estremeñu namás, tamién el restu de lenguas amenuías, espricandu la infrujencia que tien la escuela i los canalis de comunicación i tamién otras causas estóricas comu la emigración.
 Arrematemus con angunus endilguinus del estremeñu dela parti de San Vicenti-Abuquerqui-La Cosera, lo qual hue de gran interés palos assestentis. Lo mesmu lo más nuevus que los mayoris comentavan palabras delas que diziamus i otras que divan aportandu, palabras i espressionis cona vida cotidiana i la corcha. Ata un zagalinu asseñaló que se dizi hazemus con h- aspirá.
 Ala terminación, el Juanma, en representación de La Besana, onró la nuestra participación con una corcha i unas palabras d'agraecimientu. Quasi sin dexal tiempu pa leel lo que ponía, la genti, con una sonrisa ena cara mos dio la norabuena i reconoció el trabaju que estamus hiziendu comu associación i que sigamus assina. No huerun pocus los que acuyerun a compartil el vocabulariu sanvicenteñu i a ensestil que vaigamus otra ves pa palral en el estitutu del puebru.
 Ligeramenti, estuvimus a vel enantis la muestra de tragis dela FEF i que agora está ala vista tola semana esta en el andal cimeru del museu.

Mos alegró vel caras conocías i tenel un púbricu de tolas edais, dendi zagalis ata mayoris, con buena concencia del patrimoniu oral i coltural estremeñu. Está polo claru que la briega que tien La Besana en San Vicenti en custionis colturalis es de grandi hondura i cuenta con el sostribu i interés dela genti. Comu passó en Frexenal, vemus que la lavol delas associacionis colturalis delos puebrus muevi lo estremeñu más que goviernu ni almenistración nenguna, derechamenti cona genti, sacandu dondi no ai i con un eshuerçu que muchas vezis no lo valorean. La preva la estamus viendu en estus puebrus, ondi la genti es gustosa de oyel-mus i si mos descuidamus, no mos dexan dil-mus en tola nochi! Agraecemus al Juanma i a La Besana esta oportuniá de comproval que entovía se palra estremeñu en San Vicenti i que entovía tienin ganas de que assina sea.

*Retrataúras de José Manuel Jerez, Ismael Carmona i de La Besana.

No hay comentarios:

Publicar un comentario