sábado, 31 de enero de 2015

Chalra nel Ateneu de Caçris

Enque la tardi estava bastanti mala comu pa movel-si del butacón, saquemus huerças i ganas pa pescal el cochi i dil pa Caçris, comu dis el castellanu contra viento y marea, literalmenti.
Los del OSCEC mos ajuntemus un ratinu enantis ena Praça Mayol pa tenteal angunus temas tocantis ala associación i alas 7,30 ahilemus pal palaciu ondi está la sé del Ateneu cacereñu.
Dispués d'algún malentendíu por custión del proyetol i el ordenaol, aviemus la sala i entre librus i assientus acoloquemus el nuestru letreru duranti allegava la genti: era la primel ves que'l OSCEC vesitava el Ateneu, puntu d'encuentru de genti leía i conoceora dela capital cacereña.
El Ismael a empeçal la chalra junta Antonio Lasaosa
 Pos velaí que'l primeru en apotal hue Antonio Lasaosa, quien hue presentaol dela associación i del palranti, el Ismael. El púbricu hue téntigu de má que puímus empeçal quasi que ala ora prevista.
Retrataúra dela sala i el púbricu duranti la chalra
 El Ismael despusu una chalra partía en dos temas prencipalis: poblemas filológicus del estremeñu i poblemas realis. Drentu del primel puntu estuvu a esprical custionis del andal filológicu atillau al estremeñu i a quasi que qualquiera lengua amenuía. Preguntas comu si es lengua o dialetu, estremeñu o castúu, origin i destensión, utiliá del estremeñu, mesmu bandeó polas creyencias falsas i opinionis destinás que ai al reol del estremeñu.

Momentu dela carava
 Ena segunda parti, los poblemas realis, el Ismael descrivió el estremeñu de lengua amenuía i repuntá dandu causas estóricas rezientis que lo esprican i ata las conseqüencia que estamus sintiendu agora ena sociedá. El resumi traiva comu poblemas de verdá la falta de conocencia, d'apreciu, l'aminución del númiru de palrantis, l'assencia enos pranis d'estudiamientu i l'assencia de políticas lingüísticas.
El púbricu a oyel la entrevención dunu delos assestentis
La chalra que duró pocu más duna ora causó otras muchas custionis entre el púbricu, que de no bel fechau el Ateneu tan tempranu poíamus bel estau oras i oras caraveandu. La primel custión vinu por parti de Lasaosa, quien se susprendió de bel entendíu quasi que tola carava, en siendu él aragonés i estandu la chalra palrá en estremeñu. Asseñaló que essi comprendimientu venía por sel variantis i que era en aquellus elementus más deferenciaoris ondi teniamus que envestigal i era precisu conserval. El Ismael contestó que aquellu se devía a sel toas lenguas ermanas del mesmu troncón latinu i que estava polo claru que ai comprendimientu entre las lenguas romancis, enque alas vezis ena oraliá no lo sean tantu comu ena escritura. 
Una señora del púbricu, professora de Bioquímica, asseñaló la precisión d'essa etiqueta lingüística de estremeñu pa con ellu sostribal el conceutu d'entidá. Pusu por comparança el propiu cuerpu, del que ella aprendi los muchachus, que ai que partil delo más cercanu pa conocel lo dahuera alogu. 
El Carlos del Sol a palral
Otras osservancia tocavan el farrungamientu del estremeñu por causa duna mala política en Estremaúra. No se comprendía cómu en Estremaúra, a pesal dela riqueza coltural que ai, la lengua nunca rezara drentu delos puntus de avíu dela almenistración o el goviernu. Aquella hue, sin duda, la pregunta que más alargó la carava, pos era la más compricá i truxu varias contiestas.

Un zagal de Moraleja asseñaló que'l pesu huerti de tó estu estava na estoria delos estremeñus, peru que con tó i con essu ai palrantis monolingüis que namás sabin palran en estremeñu i que por sel fabetus no alquirierun la vergüença de palral ena lengua materna. Más, dixu que su avuela de Calçaílla namás sabía estremeñu peru que se hazía entendel con qualquiera ena idea de que las lenguas sirvin pa comunical-si. 
Otru señol dixu suspressu que cómu era possibli que Caçris en 20 añus se huera vueltu tan "fina" ena palraera, que quandu el jovin no se palrava castellanu ena capital. Otru zagal de Brovalis, pala parti de Xerés, asseñaló que s'entendía i entendía perfetamenti el portugués precisamenti polo que se apareci al estremeñu ena su parti i que con tó lo de sul que es, gastava tolas palabras que'l Ismael diva dixiendu ena palramenta.
Concluímus en que'l estremeñu es un continu drentu delas lenguas romancis dela parti ocidental, arrayá-lu es impossibli, lo mesmu que ponel arrayu a otras lenguas romancis. Lo prencipal es concencial i hazel conoceoris los propius estremeñu del patrimoniu que tienin i precural componel los grandis poblemas sociolingüísticus que tien, enantis que los filológicus. 
Con esti autu i la proyeción de Territoriu de Bandolerus la semana que vien en el Ateneu, el mundu leíu de Caçris está siendu tamién conoceol dela ralidá del estremeñu. 
*Retrataúras Carlos del Sol i Ismael Carmona.

No hay comentarios:

Publicar un comentario