domingo, 11 de enero de 2015

El día las letras en estremeñu

Dispués delos Reyis Magus passal, queandu enos comercius las targetas i enas casas los regalus (a piqui de descambial), regressamus ala caxa comu un ríu aventau: a pocu a pocu i con tola ribera derrotá. Los coraçonis voluntosus i las faldiqueras vazías hazin que vaigamus pensandu cómu cogel el passu delos tiempus i no acabal achorchau. Ayúan a llevá-lu los librus i las ideas que dimanan d'ellus, ara que las propagandas de coloñas las muarun por abaxás de precius, ginasius i curativas. Caçris velaquí la mañana de Reyis la echa an pie dela estauta de Gabriel y Galán. Esti maestru salmantinu tuvu la virtú de convertil-si en un crássicu i, por essu, sirvió de modelu i espiración a muchus escrivientis daquí, múus unus, abexinaus otrus, paque s'enliaran a gastal la lengua del puebru enas sus criacionis literarias. Con él s'avançó un alabán de poetas que, duranti el sigru XX, cona holgura que da el no avel una norma escrita (ata agora), divan enxaretandu las letras en estremeñu. El martis passau, velaí, el OSCEC revindicó essi día, el 6 d'eneru, pa celebral la literatura en estremeñu. La huerça delos versus de Gabriel y Galán retoñeci ca ves que un escritol estremeñu decidi gastal dela lengua del puebru. Comu has el cacharreru que prefieri el barru delos barrealis localis que no el importau palas sus vasijas, ansí á de barajal mejol la lengua el escritol daquí, porque es la de él. Muchus escritoris no s'arrochan ya con el estremeñu, enque lo sientin endrentu, porque no conocin la obra d'otrus que sí lo hizun o por no sabel poné-lu por escritu o porque no ván a tenel quién los lea. I tós essus mieus son los que le ponin grillus a Calíopi, añusgan Eratu i desnortan la memoria de Clíu. Las prumas del estremeñu alampan por tinta i papel, porque, al cabu los sigrus, tienin muchas cosas que contal!

El día las letras en estremeñu ( El Periódico Extremadura - 11/01/2015 )
 El día las letras en estremeñu ( La Crónica de Badajoz - 11/01/2015 )

No hay comentarios:

Publicar un comentario