martes, 6 de enero de 2015

Omenagi a Gabriel y Galán 2015

Un otru añu más el OSCEC s'ajunta an pie dela estauta de Gabriel y Galán en Caçris pa recordal la importancia que tuvu palas letras en estremeñu. La Asociación de Poetas Amigos de la Estatua a Gabriel y Galán comu ca añu dendi vai ya 90 añus aprepara pal día 6 de eneru, fecha dela muerti del maestru i poeta, un omenagi sentíu arroeaus de associacionis, poetas, escrivientis, professoris, pairis, ijus i avuelus.

El Matías a presental
 El Matías, con el desparpaju que lo señala, s'encargó de guial i presental los premius i los participantis. Esti añu, hueraparti del premiu de poesía alos zagalis, l'associación reconoció la lavol docenti de Manuel Izquierdo.
Benito García
 En el autu contó cona presencia dun almiraol castellanu, Benito García, quien alos 90 añus, dispués de toa una vida literaria palró de manera mu sentía a tentu delo que senificava la poesía del maestru charru. Allí palró del librinu que traíva consigu, Lauda de estrellas, con el que omenagea juntu con otrus condiscípulus la figura de Gabriel y Galán.
Rosa Perona
 Otra escrivienti que participó, calavoraora del pograma el Rincón Extremeño enas retrasmissionis que has con Jesús Baños dendi la unidá mobi, hue Rosa Perona. Leyó dos poesías del su nuevu libru alo primeru del autu.
El Matías i Franquete a dal ánimus a Pepe Extremadura
 Comu esti añu no contemus con Pepe Extremadura por causa delos pobremas de salú que tien rezientimenti, lo mesmu el Matías que'l Franquete lo mentarun i lo animarun an pie dela estauta.
Púbricu a sentil las zagalinas del PROA

Muchachinas del PROA de Caçris
 El silenciu dela genti pa sentil las poesías de varias alunas del PROA de Caçris hue espasmosu. Acibierun un premiu pol su eshuerçu i el púbricu lo valoreó con varius aplausus sigún divan echandu las poesías.
 Varius zagalis delas escuelas cacereñas, lo mesmu púbricas que privás huerun desfilandu pol estaribel junta los maestrus, diretoris i familiaris sostribandu esti día especial pa ellus. Esperamus que pal añu que venga, dendi la associación propongan la modalidá bilingüi comu otrus añus s'án hechu paque los muchachinus cacereñus vaigan conociendu la lengua delos sus avuelus.
El Ismael a palral
 La nuestra calavoración vinu por parti de varius biembrus que acuímus a recital, leel i palral. El Ismael valoreó el vencijón que dio Gabriel y Galán ala literatura estremeña. Por apedimientu del púbricu, pongu velaquí lo dichu:


So Ismael Carmona, presidenti del OSCEC, associación dendi la que defendemus la lengua delos nuestrus avuelus, ya que palos nietus la mandarun olvial i los ijus s’avergüençan d’ella. Dispués dunus añus viniendu an pie dela estauta del Gravielinu en esta celebración que ajunta muchachinus, pairis, avuelus i escrivientis, me preguntu si con ellu mos recordamus del empeçaol en esta tierra delas letras del puebru. Vinu dahuera, de Salamanca i comu otrus tantus que vinun, tuvun que señalal por escritu cona pruma del poeta las vivencias i sentiris de paquí. Comu si en Estremaúra, múus pol abexinamientu o pola miseria, agachapaus comu la presa dun caçaol o ensotaus en el clissamientu dela nuestra estoria, faltaran los escrivientis que sintieran cómu palra la tierra por mé dela su genti.
Un salmantinu con el pechu mangriosu delos campus castellanus, s’assentó aquí sin olvial dóndi venía i precuró maural comu ombri i poeta ena nuestra tierra. Gracias a esti poeta, que’l imagi velaquí atrás está hartu de vel semáforus i cochis i se sueña conas hacinas i los secretus dela virgi dela Montaña, gracias a él, aquellus poetas estremeñus, múus de verbus, s’enliarun a cogé-lus del puebru pa escrevil i en ellus entendierun mejol la tierra ondi vivían, pos las leyendas en castellanu le tenía distraía la menti. Por causa d’esti poeta el sigru XX está llenu de poesías en estremeñu i los sus cantus huerun tan sonaus comu las copras que cantavan las lavanderas o los moçus enas rondas. Agora que no se canta en parti nenguna, que la lengua delos avuelus l’aburrin tous ustés ca ves que se piensan que por palral assina es no sabel palral, agora que Gabriel y Galán no se lei enas escuelas, devemus de preguntal-mus si tien sentíu celebrá-lu.
A aquellus que son favoritus delo forasteru i se piensan que renegal dela coltura antigüíssima d’esta tierra es sel modernus i es dil conos tiempus, le digu que ná ai más tristi que quien passa pola vida sin bebel dela huenti ondi nació. No crean ustés que por correl mundu, bandeal paísis i ponel retrataúras en interné vos hadrá grandis: acreci los coraçonis el poel hazel tó essu cona libertá que da el sabel dóndi vienis. Con tolo ligeru que corri el mundu, paici que mos falta la memoria alo largu i mos pensamus que tó hue comu es agora. Vemus tan divissu quandu miramus patrás porque la canga i los aperus mos lastima el pescueçu ca ves que queremus torcel la cabeça. Las antiojeras mos estrecha la vista i no mos damus cuenta que lo que queamus atrás es un surcu que otrus sembrarán i del que otrus comerán. Assina dimus los estremeñus que mos desaculamus dela nuestra estoria, dela nuestra coltura i dela nuestra lengua, que sin sel mejol ni peol que la de otras partis, tien la virtú de sel nuestra i de más naidi. Por essu devemus de celebrá-lu, pa agraecel el ajuntal-mus aquí tós dispués de tantus añus, no por otra cosa si no por premitil que los sus versus no s’olvíin, peru tapocu los de Gaudencio Balbino, Juan García García, Luis Chamizo, Pepe Ramírez, Rufino Delgado, Enrique Louzado, Gonzalo Alonso i tantus otrus que cantarun las nuestras cosinas ena lengua de quasi tós los estremeñus i, si el cariñu i la voluntá s’ajuntan, paque otrus poetas nuevus naçan i sigan escriviendu en estremeñu, en xalimegu, en portugués, lenguas toas daquí. Vivimus en una tierra rica en naturaleza i en coltura, no premitamus que mos pintin el coraçón de gris i conas antiojeras sigamus ahilandu pa no sabemus óndi. Mejol que mos passi comu al Pedru i ala María i digamus
Tierra bien holgá i de sierra…
lo que le jechis te cría!…
—I assín devi sel la tierra,
i assín la genti… agraecía!

Viva Gabriel y Galán!
Viva Estremaúra!


 Varias recitaoras siguierun, dispués de tocal la banda alas 13:00, con poesías propias i ajenas, asseñalandu un Embargu bastanti castellaneau.
El Bienvenido a recital una poesía del Cruz
 El Bienvenido, comu el Cruz en pessona i el tíu Angeleti no púun venil esti añu, leyó una delas poesías d'essi grandi poeta de Casillas de Coria. Tamién echó otra dela Cigarra Extremeña, aportandu con ellu más poesía en estremeñu a una mañana ena que el OSCEC aportó la parti ena nuestra lengua.
 No faltarun otrus participantis que con gran méritu s'animarun a recital largus versus, ya descaecíus, peru que volvierun a revivil ena mañana ena que la niebla mos arropó quasi que tol ratu.
El Daniel Gordo a recital en gallegu i estremeñu
 El Daniel leyó en gallegu i en estremeñu, arreglu ala su dobri rescreencia, quiciá la primel ves ondi se sientin tantas lenguas en tan pocu tiempu en esti omenagi. Recramó, con toa razón, esti día comu el día delas letras en estremeñu.

Un poeta cacereñu nuevu que sentía la ciá de coraçón i palabra

Vezeru del omenagi con una poesía propia
 La última entrevención del OSCEC hue la del vicepresidenti Carlos del Sol que echó una poesía propia en estremeñu, ena que asseñala que la muerti duna lengua es tamién la del puebru que la palra.
Carlos del Sol a recital
 Arremató el autu Joaquín García Plata que al cabu delas décadas sigui promoviendu las letras en Caçris i la figura de Gabriel y Galán.
El Joaquín a arrematal el autu
Esti añu, el númiru de participantis hue más numerosu que otrus añus, tantu de genti nueva comu vieja, con poesías propias comu gravielanas. El propiu Matías estava suspresu con tanta poesía i entrevencionis. El OSCEC, acontinandu la lavol de defensa i promovición del estremeñu i delas letras estremeñas contribuyó en el autu con varius biembrus, angunus delos qualis s'estrenavan en púbricu, ena idea de que en palrandu i en hiziendu literatura en estremeñu damus galantía d'acontinança ala lengua. El mensagi le queó claru a utoriais, maestrus, professoris i pairis que resultarun ena celebración: el día delas letras en estremeñu aconteci el día 6, allí, an pie de Gabriel y Galán, el empeçaol dela literatura en estremeñu. 90 añus de celebración, sostriban la figura del maestru i d'aquellus poetas i escrivientis que sientin Estremaúra.

1 comentario:

  1. Me leví este trabalho de passeu por esses mundos que agora chamam das redis sociais.
    Que o presente ano, vos traia mui boa cosecha.

    ResponderEliminar