domingo, 29 de marzo de 2015

El estremeñu enas escuelas?

 

El lunis d'esta semana vesitemus essu que dizin velaí "la casa de tolos estremeñus". No hue por escursión, ni por gustu, ni pa tiral unus retratus: huimus el OSCEC convocaus dela Comisión de Educación y Cultura pa dal norti dela sitación delas lenguas amenuías en Estremaúra. Comu associación coltural que llevamus unus añinus a defendel las lenguas vernáculas daquí i en representación delos estremeñus i d'otras associacionis, quijimus de mandal sabel alos nuestrus representantis políticus en qué estau están essas lenguas, las quexas delos palrantis i las cosas que se puein hazel pa salval esti tesoru nuestru. Tres son las cosas que, sostribandu-mus en el nuestru Estatutu, piímus: Reconocencia legal i coficialidá del estremeñu, xalimegu i portugués rayanu, una assinatura de Coltura Estremeña drentu delos curricula ondi aprendel estas lenguas i un vencijón por parti delos canalis de comunicación púbricus ala coltura oral tradicional. Quasi que tolos grupus estuvun a favol del proponimientu, especialmenti de que s'aprendan i se respetin estas lenguas. Testimoniu dellu, la gravación ena sessión d'essi día dela Comisión. Ara, comu las palabras por muchu que estén en hormatu .avi o en papiru de Nilu no mos sacan de ná, confiamus en que essus mesmus políticus que huerun gustantis i conformis alo dichu mos ayúin a que s'ensequi essa simienti malina i çugona que mos destutana i dela que palremus la semana passá, paque poamus dinifical la nuestra coltura estremeña comu se mereci, prencipiandu pola concencia propia delos estremeñus i segundandu polas sus idiomas. Está polo claru que dessigil en prenu sigru XXI la reconocencia dela nuestra coltura oral por parti dela Almenistración, quandu por huera está más que reconocía, puei paecel una gaspachá, más que ná, porque estu ai muchus añus que tenía de bel-si mirau. Sin embargu, el apitíu ya lo amus pegau: agora mos quea que esperal la contiesta.

No hay comentarios:

Publicar un comentario