domingo, 30 de agosto de 2015

El curacu i la catamusa



La Serraílla susprendi ca ves más. Dispués d'atravessal Taju aportamus allí, ondi esperava un amigu que s'estrenava enas custionis serraillanas. Venía con unus meritensis i los serraillanus, deque los vidun folasterus, preguntarun que si de tan largu venían a vel el día dela habla. Pos cadacé! Al ratininu ya prencipió la genti a raceal pallí revestíus conas chambras i los pañuelus. Ena calli Pai Juan vemus algu curiosu: en una delas casas ai un "estrebejil" bien presenteru. Pui qué acuerdu era aquel? Más alantinu una estauta arrebujá suava alampandu pol airi, más acaína más palabras i ena parti dallá otras... Preguntemus alos vezinus i dixun que por tol puebru están essas palabras del vocabulariu serraillanu, hiziendu delas callis brancas páginas dun dicionariu que qualquiera puei vel. Ena praça mos encontremus conos amigus del Duendi, que ya mos barruntavamus que era cosa d'ellus. Esti añu sacarun las palabras de hierru que, con el pesu dela estoria i el usu delos tiempus, luzían enas fachás delas casas d'ozenas de vezinus. El passacallis prencipió i la primel palabra que vimus hue la de "platijirri" entre sonis de xotas i el bulliciu dela genti. Siguierun "ogañu" i otras comu el "Curacu" i la "Catamusa" ata abocal an pie d'aquel menumentu arrebujau que vimus enantis. Conos ganus delos bandolerus, el Cabrerín apareció a escarrapachonis en el cavallu, siempri corriendu sin movel-si. Peru no se confundan, essu menumentu no es apología del contrabandeu, es el símbolu dela unión dun puebru que s'ajuntó pa graval una penícula i salval con ella un cachu dela estoria dela comarca. Dela caterva de serraillanus, gruñioris i folasterus no uvu quien no se retratara junta la estauta. La nochi acabó con unas sopas de tomati i unus higus entre relatus de lobus, delas facatúas del Airón i del Curacu. Velaquí un puebru ondi la coltura tradicional no la hondean, más bien la luzi i convida el vesitanti a conocé-la. Si se quean cona golilla, ena Serraílla los esperan!

El Curacu i la Cantamusa ( El Periódico Extremadura - 30/08/2015 )  
El Curacu i la Cantamusa ( La Crónica de Badajoz - 30/08/2015 )

No hay comentarios:

Publicar un comentario