domingo, 16 de agosto de 2015

La seca, la quema i la gata

 
*Retratu dela sierra sacau en La Vanguardia
Si la tierra tuviera vos pa quexal-si delas facatúas del ombri contra ella, el gritíu duraría milis d'añus. Peru ella suporta múa el asfissii del alquitrán, la química del surcu i los inciendus. Criaora de vida i mairi de tós nusotrus, mos revolvemus contra ella i comu ijus desagradecíus i esuístas, cegaus más pol interés propiu que pol bien de tós, mos hazemus amus dun cortiju sin llavi que destravessamus ca ves que mos da la gana.

La Iberia ardi. No es namás la sierra Gata. Sierras, montis, pastus ardin andiquiera. Dirán que es una lástima pol paisagi, peru la verdá es que delo más odiosu que puei hazel el ombri contra la naturaleza es creel-si Zeu con un mistu i prendel el suelu agora que has calol, que assopra el airi i que está to secu. Ai relación entre leis que jugan con el usu del suelu i la maera i tantu inciendu? Qué sabemus allá! Ara, no son concidencias dela vida que aigan varius focus o que los pinus folasterus que pobran sierras i sierras estremeñas salgan a ardel a ca no ná, precisamenti quandu más descudiaus estamus, assín, por combustión espontania. 

Me recuerdu delos viagis pala sierra Gata quandu andava a trabajal en Coria, las oras de carava conos cilleranus que me contavan fiestas i cantaris, con angún amabli soyanu junta las casas de piera, conus viejus azevanus que me contavan dela guerra o los peraliegus que endilgavan pa casas i escúus. Dendi el castillu de Treveju se sobrecogi el ombri conas vistas duna tierra engurruñá por cima delas vegas d'Alagón. Agora, la vida d'estus puebrus de piera muará i precisarán d'ayúa pa recuperal la sierra i los campus conas simientis provincias i la briega de muchas manus: ayúa pa reponel la sierra que vuelvan los amoraoris i animalis ala su vida i el cariñu i la briega de tolos estremeñus, si la burocracia lo premiti. I si la justicia del ombri pena el naturicidiu, que castigui, porque la bondá dela tierra arropa con el su polvu lo mesmu el culpabli que'l inocenti. 


La seca, la quema i la gata ( La Crónica de Badajoz - 16/08/2015 )

No hay comentarios:

Publicar un comentario